El responsable de la seición sindical de la CSI nel taller de Barros refuga la ufierta económica de Duro-Felguera y desixe la so realmisión

L’actu conciliación cellebráu güei , llunes 17 de xunu, pol despidu del responsable de la Sección Sindical de CSI nel taller de Barros de la empresa Duro-Felguera, finó ensin alcuerdu.

El trabayador atopábase so ún de los contratos-relevu alcordaos pola Empresa y los Comités y qu’obliga a la empresa a anovar automáticamente talu contratu nel intre cumplise les condiciones afitaes pal relevu.

La Empresa incumplió dichu alcuerdu y despidió de forma illegal al trabayador, dexando nel aire non yá esti contratu, sinón tamién el futuru de los puestos de trabayu del restu trabayadores que s’atopen en contratu-relevu.

Mientres l’actu de conciliación, la empresa ufiertó al trabayador una cantidá de dineru en cuenta d’arrenunciar al so puestu trabayu, pero’l responsable la Sección Sindical de CSI en Barros, refugó esta ufierta y desixó la reincorporación al so puestu trabayu.

El representante de la empresa Duro-Felguera foi bien claro y aconseyó al trabayador aceptar esa cantidá de dineru “porque esto ye lo másimu que puedes sacar; la empresa va pesllar los talleres, yá lo dixo’l mesmu presidente del Grupu Duru-Felguera”.

El responsable de CSI en Barros va demandar a la empresa y va siguir lluchando pola so reincorporación a la empresa “porque nun podemos permitinos nin un paráu nin una parada más y porque esto nun ye sinón un pasu más nel plan empresarial de cerrar tolos sos talleres en Llangréu”.

CSI-Barros (Duro-Felguera)