Crónica de la marcha-manifestación de Mieres

Unes 600 persones participaron en LA Marcha-manifestación escontra’l paru, la corrupción, los retayos y la represión, convocada en Mieres polos sindicatos CSI, CNT, CXT y SUATEA, y los colectivos sociales Coleutivu de Para@s-Precari@s d’Asturies, FUSOA, Despidíos subcontrates d’Hunosa, Centru Social Sestaferia, Asociación Picu Rabicu, Asociación escontra la esclusión Alambique, Asociación L’Arcu la Vieya, Centru Social La Semiente y Plataforma de Afecta@s pola Hipoteca.

La Marcha entamó cola quema d’un moñecu con forma de “platanito” y el mazcaritu del Ministru Soria “que representa lo que vamos faer cola política económica, llaboral y social del Gobiernu y de la Troika”.

Una pancarta, esplegada a lo cimero d’un edificiu universitariu, col lema “Llucha obrera pola Universidá”, recordaba la llucha que’l movimientu obreru llevó alantre pa que los fíos y fíes de los y les y trabayadores aportaren a los estudios universitarios y que “agora vamos tener que volver retomar porque quieren echar a la xente obrero de la Universidá, pero la llucha obrera volverá torgalo”.

La represión llaboral y les condiciones de trabayu esclavistes de Telepizza, merecieron la pegada de cartelos de protesta nos cristales d’una de les sos franquicies, el empar que s’informaba “del despidu nesta empresa, de seiciones sindicales enteres de la CNT, por defender los drechos de los y les trabayadores”, pa concluyir que “el secretu de Telepizza nun ta na pasta, ta na rata”.

SUATEA esplegó una pancarta en defensa de la Educación Pública y pidía la retirada darréu de la LOMCE

Toles sucursales bancaries fueron “decoraes” con pancartes acusando a la banca de “criminales, porque inducen a les persones al suicidiu acosándoles y quitándo-yos les sos viviendes y estafando a la xente con preferentes y préstamos abusivos”. Acusóse a la banca de ser “los vampiros de la clas obrera, de llevanos a la probeza pola so avaricia y d’utilizar el so dineru pa enllenar el mundu de guerra, fame y miseria”.

El Coleutivu de Para@s-Precari@s d’Asturies, pegó una pancarta nes cristaleres del INEM, esixendo “un trabayu y un salariu dignos, pa poder vivir”.

El colectivu Muyeres en Llucha. de la CSI, colgó una pancarta delantre de la ilesia, reivindicando’l derechu al albuertu llibre, llegal, de baldre y seguru.

Pa terminar, la Marcha solidarizóse cola fuelga xeneral que tuvo llugar en Euskal Herría y recordóse que “si l’ataque del capitalismu ye total, la respuesta de la clase obrera tamién va ser total”.

Berros de ¡Puxa la llucha obrera! y Puxa Asturies!, punxeron fin a esta movilización.