La CSI sofita la Fuelga Xeneral del 30 de mayu n’Euskal Herria

La Corriente Sindical d’Izquierda quier faer públicu’l so sofitu a la fuelga xeneral convocada por LAB y la mayoría sindical y social vasca, pal próximu xueves 30 de mayu.

L’esaxeráu xorrecimientu’l paru, l’esmantelamientu de los servicios públicos (Sanidá, Educación, Servicios Sociales, etc.), el desafranáu aumentu del nivel de probeza, la Reforma Llaboral, la precarización xeneralizada de les condiciones de trabayu y la brutal represión de les protestes y movilizaciones obreres, son razones enforma pa entamar cuantes fuelgues sían precises p’algamar la xusta repartida de la riqueza, recuperar los derechos sociales pa toes y toos y, cuantimás, el derechu de toles persones a vivir dignamente pol meru fechu de selo.

Pa la CSI, l’actual sistema capitalista namás nos lleva a la ruina y a les y los trabayadores nun nos queda otra alternativa que la movilización pa poner frenu a les continues agresiones que tamos sufriendo.

La CSI considera qu’esta fuelga tien d’espardese al restu l’Estáu español, dando pasu a una movilización xeneral de la clas obrera que, solidariamente cola del restu los pueblos d’Europa, plante cara al capitalismu y construya nueves alternatives a l’actual situación de probeza y represión xeneralizaes.