Recibimientu a sindicalistes amenazaos de Colombia y presentación del informe asturianu de drechos humanos

Ayeri llunes, tuvo llugar nos llocales de la CSI na Casa Sindical de Xixón el recibimientu a sindicalistes colombianos acoyíos/es al Programa asturianu d’atención a les víctimes de la violencia colombiana.
Ellí pudimos oyer como les/los compañeres nos narraben su militancia en Colombia, les dures condiciones nes que pelean polos drechos de toes/os, y cómo s’enfrenten a persecuciones ya intentos d’asesinatu escontra elles/os y los/es compañeros.

1-. WALTER AGREDO MUÑOZ. Periodista, filósofu, defensor de drechos humanos, responsable de la Fundación Comité de Solidaridá colos Presos Políticos Seccional Valle del Cauca. Ta amenaciáu de muerte.

2-. MARCU REINERIO MONTEALEGRE CERQUERA. Dirixente campesín, defensor de drechos humanos, Presidente ASTRACATOL, Asociación de Campesinos del Conceyu de Rovira, Departamentu del Tolima. Recibió repitíes amenaces de muerte de los paramilitares, del exércitu y de la policía nacional. Dellos de los sos compañeros fueron asesinaos.

3-. ELSIDA COLORAES MENCO. Defensora de los drechos humanos, integrante’l Comité Executivu Nacional d’ANDES, integrante de la Coordinación Nacional de Movíos. Ta amenaciada de muerte pol grupu paramilitar Los Rastroxos.

4-. ANDRÉS MANUEL BOHORQUEZ DE LA ROSA. Secretariu Xeneral del Sindicatu Nacional de Profesionales de la Industria de la Seguridá en Colombia, SINPROSEC-CUT, defensor de drechos humanos. Siendo parte d’un esquema de seguridá, repelió un atentáu (marzu/05) contra un dirixente de la USO, resultando feríu. Sufre siguimientos y graves amenaces de Los Rastroxos.

Faltaba un compañeru, que tovía ta cola burocracia de los papeles y visados necesarios pa poder salir de Colombia, y esperamos pal prósimu mes:

5-. RAFAEL CABARCAS (A partir de Xunu). Dirixente sindical d’USU-CUT, miembru de la dirección nacional del PDA, defensor de drechos humanos sobreviviente d’un atentáu (marzu/05) resultando feríu. Ye víctima de siguimientos y graves amenaces de Los Rastroxos.

Dempués de la intervención de los compañeros colombianos, se fizo una presentación/esplicación del Informe asturianu de drechos humanos, que sedrá publicáu en breve. Anque tolos casos son importantes, nomar equí la situación de los trabayaores de la mina de Goldman Sachs, en El Cerrejón. Esta ye la mina qu’envía’l carbón mancháu de sangre de los sos mineros, al Puertu del Musel, demientres equí van zarrando una tras otra toles mines. Ellí despidos, enfermedaes, muertes, trabayaores en fuelga dende va 3 meses. Equí pieslle y pobreza pa toles cuenques que dependen de la mineria.

En breve CSI Audivisuales sacará una entrevista de los/es compañeres de Colombia.

Artículu sobre la mina El Cerrejón:
FUELGA NA MINA COLOMBIANA DE “EL CERREJÓN” (LA MINA QU’UNVIA EL CARBÓN A ASTURIES)