Concentración en solidaridá coles trabayaores asesinaes en Bangladesh

CSI y Picu Rabicu

COMUNICÁU ANTE L’HOMICIDIU DE MÁS DE MIL TRABAYADORES EN BANGLADESH

El pasáu 24 d’abril, sólo unos meses dempués de la quema d’una fábrica nun suburbio de Dacca que dexó más de cien muertes, un edificiu onde trabayaben 3.000 persones, casi toes muyeres, desplomóse tamién en Dacca, Bangladesh.

El día anterior apaecieron resquiebros nel edificiu, construído ilegalmente sobre terrenu inestable. Sólo una compañía ordenó al so personal que nun se presentara a trabayar. Les demás obligaron a les sos trabayadores a siguir coles sos xeres, porque los sos contratos coles empreses estranxeres oblíguen-yos a apurrir un númberu determináu de prendes cá día y nun cumplilo supón arriesgase a quedar ensin el contratu.

Ente les compañíes con tiendes n’Asturies que confirmaron que producíen en dalguna de les fábriques implicaes nel sucesu figuren Primark, Benetton y El Corte Inglés. Tamién s’apunta a Sfera, C&A y Mango (al qu’el Wall Street Journal acusó de presionar pa completar un pidíu).

Sólo dos selmanes dempués, el 8 de mayu, quemóse otra fábrica, tamién en Dacca, morriendo al menos ocho persones.

Frente a esos calabres soterraos, convién parase a pensar nesti modelu económicu que nun se propón satisfaer les necesidaes básiques de les persones sinón namás l’arriquecimientu d’unos pocos, como los dueños d’estes cadenes testiles, que pa sacar más beneficios esploten hasta l’esclavismu, hasta la muerte, abusando d’aquelles presones cuya probeza nun-yos permite oponer resistencia a estes práutiques llaborales.

Y too esto ensin que se-yos mueva una ceya. Dalgunes cadenes, comu El Corte Inglés y Primark anunciaron indemnizaciones pa les víctimes, pero nun ye más qu’una llavadura de cara: primero maten y lluéu manden flores…

Como consumidores podemos escoyer, anque nun seya cenciellu. El Consumu Responsable consiste en mercar sólo lo que precisamos y pagando precios xustos por un productu de calidá y en condiciones dignes pa les y los trabayadores.

Sabemos que ye complicao ser coherente con esti discursu, la inxusticia nel comerciu ye lo que domina dientru d’esti sistema. Pero siempre podemos intercambiar, reparar, crear una prenda nueva a partir d’otres vieyes, …. Y lluchar escontra’l capitalismu.

BANGLADESH, LES VUESES MUERTES SON LES NUESES MUERTES.
CASTIGO PA TOLOS CULPABLES.

CONCENTRACIÓN EN SOLIDARIDÁ COLES TRABAYADORES ASESINAES EN BANGLADESH.