Huelga Xenaral d’educación 9 Mayu

La llucha paga

Yá lo sabíamos, los derechos que perdimos y los qu’entá caltenemos fueron frutu de la llucha, de la nuestra o de la de los que nos precedieron. Ye l’ABC, pero paez qu’hai que recordalo o demostralo continuamente. Nel últimu periodu paez que los nuesos esfuerzos por parar lo que nos vien enriba dan pocu frutu, les victories son poques, los sacrificios suplen pocu y el desánimu estiéndese. Munchos compañeros y compañeres repiten esi mantra “lluchar nun val pa ná”. Nunca podemos saber si un esfuerzu colectivu va consiguir un nuevu derechu o va parar una propuesta de perda d’otru, pero seguros tamos de que la pasividá ye garantía de derrota.

Nestos díes el mantra repítese enforma, “la fuelga nun sirve de nada”, más como una autoxustificación pal esquirolaxe que con un convencimiento total de lo que se diz. Esta xente tan práctico, que nun caltien pa sigo aquello que nun resulta útil, tendría d’arrenunciar a los frutos de la llucha, tendría de dicir pa ser consecuente consigo mesmu y ganase el respetu de los demás “sí, la fuelga nun sirve pa nada y de lo que dicís que la fuelga traxo, pa mi, nada” Nun fai falta remontase enforma y entós dici-y que si los sos fíos yá tienen 10 años yá tán n’edá pa entrar na mina, non, basta con recordar que la enseñanza pública y en particular l’asturiana nun sería como ye ensin los grandes procesos de movilización que se vivieron: el cursu 1987/1988 ,el 2000/2001 y el 2004/2005. Nun fai falta ni tan siquiera remontase unos pocos años porque va unos díes la conseyera d’educación echóse atrás nel so plan de suprimir la prórroga del contratu de branu. Col retayu yá aprobáu en conseyu de gobiernu y yá presentáu va un añu en Madrid como parte del plan d’axuste.

Un abrazu colectivu pa tolos y toles que fixeron daqué por ello. A los que dende les redes sociales trataron de concenciar y presionar, a los y les qu’entamaron recoyíes de firmes de families y docentes, a los que fueron a les concentraciones de principiu de cursu, na mesa sectorial, nel rexistru y en Plaza España, a los y les qu’escribieron cartes a la prensa y apretaron a sindicatos y partíos políticos. A los y les que nada fixeron porque nada sirve pa nada, nada.

En realidá nun se creen lo que dicen, saben que’l tren va salir anque ellos nun merquen el billete.

El 9 de mayu, toos y toes a la fuelga.