Manifestación L’asturianu, llingua oficial

Trabayaores de la llingua asturiana

La falta de reconocimientu oficial de la llingua asturiana fai que les condiciones llaborales de les persones que trabayen con esti idioma tean nuna situación de precariedá inalmisible.

La non oficialización del asturianu y la non reconocencia de la Especialidá en Llingua Asturiana fai que les condiciones llaborales de les trabayadores de la enseñanza sían les más precaries dientro’l colectivu d’interines, al nun tener derechu a presentase a unes oposiciones pa dexar de selo y poder estabilizar el so puestu de trabayu.

La enseñante de llingua asturiana nos centros educativos públicos asturianos ta condenada a la inestabilidá personal y llaboral añu tres añu, porque nun conoz hasta l’entamu del cursu escolar si va trabayar o non, y en casu de poder siguir desempeñando’l so llabor, en qué llugar lo va facer. Amás, los últimos retayos del Gobiernu asturianu dexen a les persones interines ensin contratu nos meses de branu, colos perxuicios que supón tanto nel salariu, como na cotización, nos trienios y sexenios, o na propia esperiencia llaboral.

Por si nun fuera abondo, anguaño el profesoráu que trabaya na enseñanza del idioma ta viendo cómo cuerre peligru’l so puestu de trabayu yá que na nueva llei d’educación, la LOMCE, nun se regula la enseñanza de les llingües non oficiales, polo que queda en manes de l’Alministración asturiana desenvolver esi articuláu, esto ye, el so diseñu curricular, la carga llectiva y el papel del profesoráu. Miéu nos da que sía’l mesmu Gobiernu qu’en trenta años nun foi quien pa iguar la situación de subordinación del asturianu, nin siquiera pa equiparar los derechos de les trabayadores de la llingua asturiana al restu de compañeres, el que tenga nes sos manes el futuru de la enseñanza del asturianu.

En cuantes a los servicios de normalización llingüística (SNL) nos conceyos, bien conocíes son les irregularidaes nos procesos de contratación, asina como los requisitos esixíos p’acceder a elles. Agora bien, n’empricipiando a trabayar la situación d’estes persones nun ameyora, porque la mayor parte d’elles carecen contratos añales -nel meyor de los casos- o semestrales, ensin que l’Alministración local o autonómica garantice la continuidá del SNL, y en qué condiciones, llegando, dacuando, a dase situaciones de total precariedá: atendiendo otres dependencies municipales, como la oficina de turismu o la ludoteca o trabayadores xustificando subvenciones del conceyu yá en paru y dende casa.

Aparte, les normalizadores llingüístiques nun tienen los mesmos derechos que les compañeres, como l’antigüedá llaboral o’l reconocimientu alministrativu de la so categoría profesional. Nos caberos años, recortándose los salarios yá probes y amenorgáronse les hores de trabayu según les ocurrencies del momentu, ensin que los propios conceyos o’l Gobiernu asturianu asuman a estos trabayadores como propios, quedando siempre en tierra de naide.

Otra manera, el sector audiovisual asturianu rescampla pola práctica inexistencia de trabayadores qu’usen la llingua asturiana. La TPA namás emite un 4’6% de la so programación n’asturianu y la RPA algama l’irrisoriu 1’8%, dambos datos engordaos coles repeticiones. Nun tien en plantiya a naide qu’use l’asturianu como llingua vehicular nel so llabor: nun se conocen traductores, dobladores, presentadores, correctores o actores, etc. qu’usen l’idioma como la so ferramienta de trabayu.

A lo cabero, nun podemos escaecer la situación pela que pasa’l sector editorial asturianu. Nel últimu añu pesllaron toles llibreríes especializaes nel llibru n’asturianu, y zarró l’únicu periódicu físicu que s’escribía n’asturianu y la so editorial. La propia Academia de la Llingua Asturiana, tres l’últimu retayu nel so presupuestu, ta teniendo qu’axustar muncho pa mantener a los sos trabayadores. Otra manera, esti mesmu sindicatu tien denunciaes les irregularidaes na provisión d’una plaza de traductora na Conseyería d’Educación, Cultura y Deporte, práctica bien conocida na Alministración asturiana.

Podríemos escribir munches más ringleres por omisión, pola ausencia de trabayadores de la llingua asturiana en toles estayes de la sociedá, públiques y privaes, equí, pel momentu, solo queremos denunciar y dexar constancia del perprobe númberu de trabayadores col asturianu y de la característica común que los axunta a toes: la precariedá absoluta, inda mayor que la de les sos compañeres -que yá ye dicir-, en cualesquier ocupación, ensin reconocencia de nengún tipu en tolos sectores.

Por ello, queremos convidavos a lluchar escontra esta agresión, porque’l reconocimientu del idioma ye tamién el reconocimientu de los sos trabayadores, participando de la manifestación qu’organiza la Xunta pola Defensa de la Llingua Asturiana esti vienres 3 de mayu, a les 19:30 hores, dende la Estación del Norte d’Uviéu.

¡L’asturianu llingua oficial!