Manifestación Ensin minería nun hai futuru

Piésllennos les mines. Despídennos. Abandonen les cuenques mineres a la so suerte. Nun nos dexen otra alternativa que la emigración o la fame. Ta en xuegu la desapaición del Suroccidente d’Asturies y decenes de families atópense yá nuna situación desesperada.

Mentantu, empresarios como Vitorino Alonso siguen arriqueciéndose y dexando a los trabayadores na cai, chantaxeándolos pa siguir trabayando con unes condiciones del sieglu XIX (800 €, pagues incluyíes, y 10,30 hores de xornada diaria).

Pela so parte, el PP, col Ministru Soria a la tiesta, mira pa otru llau, al empar que da empiezu al saquéu les pensiones de los trabayadores prexubilaos de la minería público y privao.

Tán desmantelando Asturies y convirtiéndola nun desiertu. Nun hai un solu sector económicu que nun s’atope a la vera la ruina y 115.000 paraos y paraes n’Asturies, yá ye una cifra intolerable que nun podemos dexar que siga xorreciendo.

Les otres cuenques mineres asturianes (Nalón y Caudal) tienen tamién estos mesmos problemes.

La defensa de la minería faise imprescindible, non yá pa la supervivencia de les families mineres, sinón pal futuru de les cuenques y del conxuntu de Asturies.

Por tou ello, y pal sector del carbón, proponemos:
1º- Nacionalización del carbón como materia primo autóctona.
2º- Paralización de tolos despidos na minería del Suroccidente de Asturies y nes subcontrates de tola minería.
3º- Quema de Carbón Estatal poles Eléctriques, como n’Alemaña.
4º- Depuración de la malversación de los Fondos Mineros, utilizando’l dineru pa la Reindustrialización, cola creación de puestos de trabayu.

¡Ye’l nuesu futuru y el de los nuesos fíos y fíes lo que ta en xuegu!. ¡El sábadu 13 d’abril, TOOS y TOES tenemos d’alleganos a la manifestación en defensa la minería!.

Convocan: Mineros afectaos por Vitorino Alonso.
Sofiten: Muyeres del carbón, Subcontrates de la minería, Coleutivo de paraes-precarios d’Asturies, CSI.