CSI sofita la campaña de denuncia de la Plataforma d’Afectaos pola Hipoteca

La Corriente Sindical d’Izquierda quier faer públicu’l so sofitu a la Plataforma de Afectaos pola Hipoteca y a la so campaña de denuncia de los responsables políticos de los desahucios.

Pa la CSI, hai qu’entamar a llamar a les coses pol so nome. Dellos partíos políticos aprueben lleis criminales qu’acaben cola vida de demasiaes presones. Porque cuando una persona ensin trabayu y ensin recursos, pierde la so vivienda y suicídase porque la so dignidá humana nun-y dexa siguir viviendo tirada na cai y comiendo de lo qu’atopa na basoria, eso ye un crimen y quienes lo provoquen y quienes lo consienten, son criminales.

Sicasí, agora’l Gobiernu criminaliza y ordena identificar y detener a quienes namás denuncien la inxusticia que supón que miles de families desahunciaes tean condergaes a vivir na cai. Al empar, los mesmos que faen les lleis que permiten hasta los desahucios más inxustos, piden agora, respetu y falen de campañes d’acoso. Los verdugos pretenden tornase en víctimes.

Pa finar, dende la CSI, afalagamos a tolos afiliaos y afiliaes del nuesu sindicatu a participar activamente en toles campañes de denuncia de cuantos desahucios se produzan y de quienes los provoquen, los amparen y los permiten.