CSI escontra la especulación nel PXOU de Xixón

La Corriente Sindical d’Izquierda quier asoleyar el so preste pola sentencia del TSXA, qu’obliga al Conceyu de Xixón a retirar el Plan Xeneral d’Ordenación Urbana y afayalo a la llegalidá actual.

Pa la CSI, el PXOU parte d’una mentira impresentable, pos escaezse de que los faraónicos proyectos previstos pa Xixón (Polu Enerxéticu del Musel, Zalia, AVE, etc.) quedáronse nun enorme fracasu y el conceyu yá nun ta n’espansión, sinón nuna recesión industrial, llaboral y económica, de la que nun vamos salir a golpe de “pelotazu”.

Nun se trata pos, como quieren faenos creer, de correxir un meru trámite burocráticu, y tornar a someter a información pública’l mesmu documentu, sinón redefinir nuevamente’l PXOU y afayalo a la nueva situación socioeconómica, territorial y medioambiental del conceyu

Pa la CSI, esti PXOU taba rexíu pola única idega de la especulación, diseñáu al dictáu de promotores y constructores, escaeciendo los intereses del conxuntu’l pueblu xixonés y dando rienda suelta a la más pura especulación.

Coles mesmes, na CSI consideramos impresentable qu’estos promotores y constructores, los mesmos que, cola burbuya inmobiliaria y el lladrillazo, empobináronnos a la crisis qu’agora tamos careciendo, pretendan, agora, dirixir los planes urbanísticos.

Pa la CSI, esta sentencia supon tou un varapalo para PSOE ya IX-Los Verdes, que, nel so momentu, aprobaron el PXOU, y un avisu a navegantes pa tolos grupos municipales del Conceyu, que tienen de poner lluz y taquígrafos na redacción de los planes d’ordenación urbana, en llugar de diseñalos al abellugu de la escuridá los despachos.

Camentamos que, d’una vegada por toes, el Gobiernu municipal y el conxuntu de partíos políticos del Conceyu, tienen que dexar d’utilizar los planes urbanísticos como fonte perenal de negociu pa unos pocos y desendolcar un urbanismu acordies col conceutu de “ciudá saludable”, atendiendo, como primer oxetivu, les necesidaes reales del conxuntu’l pueblu de Xixón.