Carta de la minería a los Conceyales del grupu popular (PP) nel ayuntamientu de Llangreu

CSI Minería

La Corriente Sindical d’Izquierda (C.S.I.) de la minería queremos amosar el nuesu más refugu dafechu a les midíes adoptaes pol Gobiernu del Partíu Popular (P.P.) escontra los Prexubilaos d’HUNOSA y escontra tolos prexubilaos de la MINERÍA PRIVADA, anulando los alcuerdos roblaos colos sindicatos nos estremaos Planes de les Empreses de la Minería Privada y de la empresa HUNOSA.

Dende la C.S.I. esiximos que’l Gobiernu del Partíu Popular col ministru Xosé Manuel Soria, a la tiesta, rectifique esta brutal agresión al Colectivu de Prexubilaos.

Dende’l sindicatu C.S.I. pensamos qu’esta midida ye puramente recaldatoria faciendo pagar a los que nun son culpables –como los milenta Familiares de Xubilaos y Prexubilaos que s’atopen en desempléu y ensin dengún ingresu económicu, que sobreviven del cobru d’estes pensiones- y faciendo de lo roblao papel moyáu, comu la realidá de los Fondos Mineros que sirvieron p’arriquecer a unos especuladores Caza-subvenciones, mal llamaos “Empresarios”, y non pa crear empléu nes cuenques.

Dende esti Sindicatu queremos apurrir igües p’Asturies y l@s Asturian@s:

1º- Nacionalización del carbón como materia primo autóctona.

2º- Non a los despidos y zarros de pozos como en Cerréu y Pilotuertu en Cangas del Narcea. Non a los despidos nes subcontrates de tola minería.

3º- Quema de Carbón Estatal poles Eléctriques.

4º- Depuración de la malversación de los Fondos Mineros, utilizando’l dineru pa la diversificación real, cola creación de puestos de trabayu.

Vds. como representantes de les Comarques Mineres, tendríen que faer de so les nueses reivindicaciones pola defensa d’Asturies y si’l Gobiernu del Partíu Popular nun rectifica, presenten ustedes la so dimisión.

Corriente Sindical d’Esquierda (C.S.I.)

Asturies, marzu de 2013