Solidaridá de la CSI colos mineros colombianos d’El Cerrejón

La Corriente Sindical d’Izquierda quier asoleyar la so solidaridá con los trabayadores en fuelga na mina colombiana d’El Cerrejón, dende’l 7 de febreru.

Coles mesmes, dende la CSI denunciamos les amenaces que recibieron los dirixentes sindicales y esixe que sían atendíes les sos demandes y s’asegure la protección integral de los sos derechos llaborales, sociales y ambientales.

Sábese que’l Departamentu de la Guajira, 30 años dempués de la esplotación de la riqueza mineral, sigue siendo’l sestu Departamentu más probe’l país, con ún de los índices de miseria y desnutrición más altos, baxa cobertoria n’accesu a la educación, onde namá’l 48.1% de la población tien vivienda propia y el 52% de los llares solo algama a cubrir les sos necesidaes diaries de subsistencia. Eso asocede mientres tolos díes, ante los güeyos de los sos habitantes, la riqueza’l Carbón marcha en fileres de vagones, de los sos territorios hacia países desconocíos.

En contraste, Carbones d’El Cerrejón Limited, como entidá compuesta poles transnacionales estractores y esportadores de carbón térmico, BHP-BILLITON, ANGLU AMERICAN, GLENCORE y XSTRATA, esploten 32 millones de tonelaes añales nun complexu mineru carboníferu a cielu abiertu, allugáu nel valle’l ríu Ranchería, algamando ganancies dende l’añu 2006 hasta’l 2011 por valor de .9 billones de pesos, mientres el costo llaboral total de los trabayadores mineros nel Cerrejón apenes algama al 6.8% de los gastos de la compañía.

Ye nesi contraste ente riqueza y miseria, que los trabayadores d’El Cerrejón recurrieron a la Negociación Colectiva, como la manera más eficaz de redistribuyir la ganancia y xenerar condiciones de vida digna.

El Pliegu presentóse’l 3 de noviembre del 2012, y nél solicítase, ente otros aspeutos, que la Compañía Carbonera reconoza que la industria minera ye d’altu riesgu. Prueba d’ello ye que na mina hai 700 trabayadores enfermos, especialmente de patoloxíes rellacionaes cola inhalación de polvillo de Carbón (silicoantracosis) y, magtar d’ello, El Cerrejón nun reconoz nin paga a los sos trabayadores la pensión por alto riesgu. Asímismo nun solucionen los problemes pa les cites médiques, pal tresporte nos buses, nun respeta los derechos de los trabayadores tercerizaos y aportuna en negar a esta población la estensión de los beneficios que reciben los trabayadores de nómina directa, ente otres reivindicaciones plantegaes na negociación colectiva.

Pero la Comisión negociadora de la Patronal presentóse a la negociación col increíble argumentu de que les baxes nel preciu del mineral nun-y dexen aceder a les solicitúes de los trabayadores, como si en dómines de precios elevaos, otorgaren distribución de beneficios ente los sos trabayadores y, peor entá, cuando güei tiense nidio na resultancia l’exerciciu económicu que, por cada US100 dólares qu’inverten, el país devuélve-yos US165, dólares, gracies a la Llei d’estabilidá xurídica de les inversiones.

Les pírricos y hasta ofensives ufiertes de la Patronal, llevaron a que los trabayadores aprobaren la fuelga y la ratificaren el día 31 de xineru de 2013, n’asamblea xeneral. Ensin soluciones nin propuestes que reconfiguraran l’escenariu de dialogo, Sintracarbón xuntu con tolos sos afiliaos llanzáronse a la batalla pa conquistar los sos derechos, llibertaes y garantíes.

La fuelga ye una tema tan grave como pa que’l gobiernu interviniere, proponiendo mediadores dende los ministerios, ensin qu’hasta’l momentu haya resultaos, mientres que, de nuevu, produciéronse amenaces intolerables a la integridá de los dirixentes sindicales y les sos families.

Consideramos que’l conflictu n’El Cerrejón adquier dimensiones d’ausencia de Soberanía y tresllada los sos efectos a les comunidaes indíxenes wayúu, cuyu territoriu ta gravemente afectáu pola Empresa de capital estranxeru, qu’inclusive s’aventura na esviadura’l cursu del ríu Ranchería.

La CSI esixe al Gobiernu de Colombia qu’atienda urxentemente les demandes y propuestes de la plantiya minera y contribuya a iguar les esmoliciones ambientales, sociales y culturales espresaes pol pueblu wayúu.

La fuelga n’El Cerrejón ye una llucha pola Salú y pola Vida, y dende Asturies, a onde llega, y almacénase por millones de tonelaes, el carbón colombianu, entiéndese y compártese la esmolición de los trabayadores, más nun momentu en que tamién n’Asturies se desenvuelven fuelgues nel sector, rellacionaes col despidu d’obreros y rebaxes de derechos llaborales, que pretende imponer la patronal.

Con unos y otros, mineros de Colombia y d’Asturies, la Corriente Sindical d’Izquierda quier compartir la so Solidaridá.