Entrega d’autoinculpaciones en solidaridá col SAT

Demientres el pasáu mes de payares cuntamos cola presencia n’Asturies de Lola Álvarez -responsable del Sindicatu Andaluz de Trabayadores en Córdoba y vocera de la ocupación de la finca de Somonte- y José Caballero -secretariu d’Organización del SAT y ún de los deteníos tres l’acción d’espropiación d’alimentos en Mercadona-, que nos falaron de les distintes estratexes de llucha del SAT, de la dura represión y de delles de les acciones que fueron desenvolviendo demientres estos meses.

El Sindicatu Andaluz de Trabayadores, SAT, ye un exemplu de llucha pa tolos colectivos sociales y movimientos sindicales del Estáu. Y, como nun podía ser d’otra manera, esa llucha asitió-yos nel puntu mira la represión y la criminalización. Asina, el SAT ye’l sindicatu más represaliáu d’Europa con pidimientos de cárcel de cerca de 50 años, 400 compañeros y compañeres procesaes y 400.000 euros en multes.

En payares, demientres la visita de les compañeres, aprovecháronse los estremaos actos entamaos pa recoyer autoinculpaciones pola acción de Mercadona.

El pasáu sábadu, día 9 febreru, una ventena de persones, en representación de CSI, Cambalache, CS La Semiente, CS Sestaferia, Picu Rabicu y L’Arcu la Vieya apurrieron más d’una centena de autoinculpaciones nel rexistru de la Delegación del Gobiernu (Uviéu), y lleváronse sellada una copia de caúna, que va ser unviada a les compañeres/os del SAT.

Queremos aprovechar esta curtia crónica pa recordar que los casos de represión tán multiplicándose, non solo n’Andalucía, sinón tamién en Asturies y en munchos otros llugares del Estáu español. La nuesa solidaridá pa toles persones represaliaes.

¡Si toquen a una tóquennos a toes!