La CSI escontra la intervención en Malí

La Corriente Sindical d’Izquierda (CSI) opónse a la intervención militar en Malí y quier manifestar el so refugu dafechu a la unviada de fuerces especiales pa misiones d’entrenamientu y mandu per parte d’Estaos Xuníos, la Unión Europea y sobremanera Francia.

La España de la corrupción pero tamién de los retayos sociales, unvió un continxente de presonal militar y medios materiales, qu’apareyen dineros qu’arrinquen de les necesidaes de la xente, pa exercer un repugnante papel colonialista en plenu sieglu XXI.

Malí, que foi y sigui siendo colonia francesa, ye un país aprobetáu pol saquéu de les sos grandes riqueces minerales que tien nel sosuelu, como oru, petróleu, uraniu y coltán. La so renta per cápita ye 45 vegaes inferior a la del Estáu español y más de la metada la población ta viviendo sol estragal de la probitú.

Esta intervención nada tien que ver con combatir al islamismu radical, sinón más bien colos intereses de les potencies occidentales, cuyes multinacionales compiten por atropar los mercaos y les fontes de materies primes, engabitándose cuandu los sos intereses tán en xuegu y cuerren peligru n’África, poles revueltes populares y la competencia china.

Les corruptes élites llocales son cómplices y tamién se beneficien d’esta situación. Paradóxicamente los y les inmigrantes de Malí que viven en Francia, son escorríos y espulsaos ensin la más mínima considerancia. En el capitalismu too s’amenorga al mercáu y, pa ellos, los millones d’africanos y africanes que carecen la tarrecible hambruna, nun-yos importen un rispiu. Si nun fuera asina, nun especularíen col preciu los cereales nel mercáu de valores, tornando la fame de millones de persones en beneficios millonarios pa unos pocos.