Nueche pinta

Na mañana’l domingu 3 de febreru de 2013, centenares de sucursales bancaries, oficines de mutues, edificios de servicios públicos en riesgu de ser privatizaos, sedes empresariales, centros económicos y financieros, etc., apaecieron retulaos con estremaes pintaes reivindicatives, en numberosos conceyos de la xeografía asturiana.

Asina, per una gran parte d’esta xeografía asturiana, podíen lleese lemes comu “Banqueros a la cárcel”, “PSOE=PP=corrupción=sobres”, “Mutues=Mercaderes de la salú”, “Non más represión”, “PP: esshho sshhí que essh falsshho”, “Sanidá Pública”, “Mutues asesines”, y munches otres reivindicaciones a la escontra’l paru, la corrupción, la represión o la privatización de la Sanidá, la Educación o los Servicios Sociales.

Tou ello paez constituyir el remanecer d’una antigua tradición asturiana conocida, en dellos pueblos d’Asturies, como “Nueche Pinta” y que paecía yá perdida o, a lo menos, escaecida.

Fontes culturales de toa solvencia, consultaes pola CSI, aseguraron que les “Nueches Pintes” formen parte, si non d’una tradición datada, sí, a lo menos, d’una antigua costume según la cual, en delles ocasiones, bien frecuentemente demientres l’Antroxu, en ciertes feches llocales señalaes o en circunstancies especiales, como acontecimientos importantes o dómines de fuertes convulsiones, la población faía patente nes cais y llugares públicos les sos quexes y esmoliciones.

La CSI, siempres comprometida cola cultura asturiana, saluda la recuperación d’esta vieya costume y anima al Pueblu Asturianu a recuperar unes tradiciones que, como esta de la “Nueche Pinta”, pueden ayudar, en gran manera, a reconstruyir el nuesu patrimoniu cultural y a tresmitilo a les futures xeneraciones, como una de nueses más preciaes ayalgues.