Corrupción del PSOE na EBHI

El pasáu 16 de xineru la plantilla y el comité de EBHI enterábase pela prensa de la contratación de José Manuel Sariego, el antiguu Secretariu Xeneral de l’Agrupación Socialista Xixonesa y conceyal del PSOE. Esi mesmu día incorpórase al departamentu de personal como xefe de negociáu.
Dende CSI queremos denunciar esti nuevu casu d’enchufismu, de mafia política socialista, y por qué non, de corrupción a la que tanto mos tien avezaos el PSOE n’Asturies.
Ta claro qu’esta nueva contratación ye una imposición esterna a EBHI por parte del PSOE, qu’usando o non a l’Autoridá Portuaria de Xixón como mensaxera, obliga a contratar como favor políticu y retiru “doráu” a unu de los suyos. Inventando pa ello una nueva plaza nel departamento de personal, plaza que toos n’EBHI sabemos que ye innecesaria, por muncho que-y dean unes funciones que ya tan cubiertes dafechu col personal d’anguaño. Y plaza que nun apaecía nos planes del empresa presentaos al comité unes selmanes enantes.
Y too esto ye más grave nuna situación como la que vivimos en EBHI, onde hai necesidaes riales en dellos puestos de produición, como’l de palistes, con un déficit nesta categoría que fae que muncho del so trabayu tea siendo subcontratao a empreses ayenes a la terminal. O el de los maquinistes, onde la empresa nun quiso cubrir les cinco places vacantes, dempués de facer y pagar una promoción interna, y tar cubriendo esos puestos con personal de menor categoría que namás que cobren la diferencia salarial por día trabayáu.
Desconocemos los méritos profesionales de José Manuel Sariego, anque sí conocemos los sos méritos políticos. Lo que también sabemos ye qu’EBHI quier siempres a los meyores. Nun hai qu’escaecer les dures prebes de seleición que se pide pa otres categorías. Cientos de candidatos nes caberes y namás que nueve les pasen. Y nun escaezamos tampoco que si nun llega ser pol so puxu, y pola presión del comité y los sindicatos, a estes altures taríen na llista del paru. Una llista onde hai más de 100.000 persones n’Asturies, a los que polo menos habría que da-yos la oportunidá d’amuesar los sos méritos pa esti puestu.
Qué dirán estos paraos y paraes, sobre too los mayores de 45 años, al ver como un servidor del PSOE tarda namás que dos meses en que lu coloquen nuna empresa pública dempués de finar la so vida política, mentantu munchos d’ellos y elles lleven años ensin trabayar y ensin dengún futuru.
Esto ye un escándalu con mayúscules, como empresa Pública que ye EBHI, de ser necesaría esta plaza tendría que salir a concursu públicu, por muncho que mos digan que coles sos falcatrues nun fae falta. Lo xusto, lo ético y lo que tendría que ser llegal ye qu’asina fuera.
Dende CSI intentose que como comité de EBHI se tomaren midíes y s’asoleyara un comunicáu de prensa pa denunciar estos graves fechos, pero tanto UGT como CCOO nun lo vieron necesario. Igual que tampoco vieron facer nada’l retu de partios con representación nel ayuntamiento o na Xunta’l Principáu. Quiciabes porque toos tienen munchos casos como esti que tapar.
Eso sí, agora que tamos en plena negociación del Conveniu Colleutivu, que nun mos vengan con retayos salariales, si hai perres pa pagar corruptos, habrales también pa los trabayadores. O van dicimos que non…