Concentración en solidaridá col pueblu saharagüi

La Corriente Sindical d’Izquierda fai un llamamientu a tola clase obrera asturiana a participar nesta movilización convocada pola Asociación d’Amigos del Pueblu Saharagüi, la Lliga d’Estudiantes Saharagüis nel Estáu Español y la Comunidá de Saharagüis Residentes en Asturies.
Dende la CSI denunciamos l’inxustu procedimientu xudicial nel que se ven envueltos 23 activistes saharagüis en siendo deteníos va dos años dempués del brutal esmantelamientu del campamentu de Gdeim Izik.
Denunciamos al Estáu marroquín polos xuicios militares que lleva a cabu ensin nengún tipu de seguridá xurídica y condergamos los actos de violencia del Gobiernu Marroquín sobre la población saharagüi. Manifestamos la nuesa esmolición ante les constantes violaciones de Derechos Humanos que causen les fuerces policiales y militares de Marruecos nos Territorios Ocupaos del Sahara Occidental y denunciamos la impunidá marroquina amparada por otros Gobiernos como los de los Estaos francés y español.
Por ello creemos necesariu caltener observadores internacionales permanentemente nos Territorios Ocupaos y en tolos xuicios a presos/as políticos/as saharagüis.
Por tou ello, espresamos el nuesu sofitu a los presos políticos saharagüis de Gdeim Izik según a los sos familiares y persones más allegaes, amosando nuesa mayor repulsa a la ocupación marroquina. Repitimos el nuesu compromisu cola llucha saharagüi denunciando la situación que sufre’l pueblu saharagüi, sofitando la reivindicación de los sos lexítimos derechos civiles y políticos y reafitando el so derechu d’Autodeterminación.
¡Llibertá presos políticos saharagüis de Gdeim Izik!. ¡Non al xuiciu militar!.