La situación de la enseñanza de la llingua asturiana y del gallego-asturianu

El pasáu xueves 17 de xineru, la Conseyera d’Educación, Ana González, manifestaba haber llegao a un alcuerdu col Ministeriu d’Educación pol que na LOMCE figurará la Llingua Asturiana como asignatura d’obligada ufierta. Dendela Corriente Sindical d’Izquierda queremos facer les siguientes consideraciones:
L’asignatura de Llingua Asturiana y Gallego-Asturianu yá ye d’obligada ufierta nos centros escolares asturianos, acordies colo dimpuesto na Llei d’usu y promoción del asturianu
Les palabres de la conseyera nun esclarien nada sobre’l futuru de l’asignatura al nun concretar como se va a inxertar ésta na reforma educativa. Esto fai que les espectatives seyan preocupantes y que pudieremos tar ante un empeoramientu grave de les condiciones: convertiéndose nuna asignatura optativa (sin alternativa), compitiendo en condiciones d’inferioridá cola Educación Artística y una segunda llingua estranxera, ye dicir, a como ta anguaño en Secundaira., mientres qu’en Secundaria podría dase’l casu de que l’asturianu compitiese con munches más asignatures de que lo fai agora; el pesu curricular podría minorizase con una carga horaria entá menor que l’actual.
La conseyera tampoco fai nenguna referencia a la situación llaboral de los docentes d’asturianu y gallego-asturianu, nin a la creación de la especialidá. Docentes que, tres trenta años de precariedá absoluta, nun cuenten con nengún tipu d’información sobre esti procesu de reforma por parte de la Conseyería y muncho menos foron consultaos sobre’l mesmu.
Dende la Corriente desiximos que la Conseyería d’Educación subsane les actuales deficiencies que sufre la enseñanza de la llingua asturiana y que garantice’l derechu a la conocencia del asturianu qu’establez l’Estatutu d’Autonomía d’Asturies, y que la Llei d’Usu y Promoción del Asturianu y del Gallego-Asturianu desarrolla garantizando la voluntariedá de la mesma, ensin tener que competir con nenguna otra asignatura.
Asina mesmo, queremos manifestar el nuestru sofitu a l’Asamblea de docentes de llingua asturiana y gallego-asturianu y a cuantes acciones promuevan.
Pa finar, nun podemos dexar de recordar que esiste una solución para resolver esta cuestión de la manera más cenciella y lóxica: la declaración d’oficialidá del asturianu.