Non a los despidos en Banesto

Trabayadores de Banesto, concentráronse ante la see bancaria en Xixón pa oponese a los despidos previstos na empresa. La Corriente Sindical d’Izquierda, con presencia nel Comité d’Empresa, foi vetada nes negociaciones que tán teniendo llugar.

Demientres la concentración fíxose públicu’l comunicáu que vien darréu:

POL CALTENIMIENTU L’EMPLEGU Y LA DIGNIDÁ DE LOS Y LES TRABAYADORES DE BANESTO

L’anunciada integración de Banesto nel Bancu Santander ye la resultancia d’un procesu doliosu pa los y les trabayadores de Banesto, que dende l’añu 1993 venimos perdiendo más de 7000 emplegos na empresa y, agora, so la cobicia del banqueru de la fórmula 1 y el so séquitu, aprovechándose d’una crisis societaria y económica de la que son los sos braeros responsables, devuélvennos el mieu y la incertidume delantre la perda d’otros 3 ó 4 mil puestos de trabayu, según les estimaciones feches polos sindicatos mayoritarios.

Paez bien significativu que la mesma empresa nun apurriera dengún datu al respective. Forma parte del cruel xuegu del gatu y el mure: con vaguedaes, la medrana amóntase.

L’alcuerdu marco robláu polos sindicatos mayoritarios en Banesto nun nos da denguna tranquilidá nesi aspeutu. Tengamos en cuenta que Banco Santander va tener d’asumir nun primer intre a más de 8000 trabayadores de Banesto, que debemos d’afayanos a los sos métodos y furrulamientu, daqué qu’a los patronos del bancu supondrá-yos un costu eleváu.

Asina, ye fácil pescanciar que la so intención (yá demosada n’otros casos como la esternalización de los fondos de pensiones o la llibranza los sábados) podría ser la de tornanos en trabayadores de segunda dientro la empresa.

Magar ye ciertu que la manera prevista pa destruyir esta cantidá de puestos de trabayu va ser aparentemente por aciu métodos vexetativos, voluntarios o pela vía les prexubilaciones, duldamos de les sos garantíes yá que el métodu de vezu, magar los estremaos alcuerdos, foi la menacia de despachu, la opción del cambéu llocalidá ya inclusive podría apaecer la novedá’l cambéu país o la flesibilidá de despidu que dexa la reforma llaboral.

Queda pendiente la negociación definitiva a la que la Corriente Sindical d’Izquierda foi vetada. Pero queremos faer llegar a los y les trabayadores, el mensax de qu’el nuesu tarrén sigue siendo la llucha por aciu la información, la protesta y la movilización y non la sumisión a los intereses empresariales, qu’hasta agora solo demosaron el so propiu arriquecimientu y la so capacidá pa llevar a más trabayadores a engrosar la cifres del paru.

CSI-BANESTO