Escontra la discriminación de lxs trabayaores na fusión Santander-Banesto

Cola apertura de les negociaciones abiertes por Banesto y Bancu de Santander p’algamar a un alcuerdu colos sindicatos, nel que se decida cómo, cuándo, cuántos y cuántes trabayadores van dexar de pertenecer a la empresa, queremos denunciar ante tolos y toles trabayadores, asina comu a la opinión pública y a les autoridaes llaborales, la discriminación a la que va sometese a una parte los mesmos, por cuenta de dos fechos:

-En primer llugar nun se convocó a la negociación a tolos sindicatos representaos nos estremaos comités d’empresa, torgando d’esta miente a un seutor de los y les trabayadores la participación nel alderique y tomar de decisiones.

Magar de solicitalo, el nuesu sindicatu nun foi convocáu por razones que desconocemos. Asina, paeznos pocu intelixente torgar la nuesa participación nel procesu, demosando d’esta miente que la llimpieza na negociación queda n’entedichu.

¿Ónde queden aquelles palabres del Conseyeru apelando al consensu y a la salida ordenada?. Bien llueu s’escaecieron d’ello. A les primeres de cambiu entamen a falar con unos y a dexar de llau a otros. ¿Podemos esperar nestes condiciones iniciales, que les baxes na empresa nun vaigan ser traumátiques, tal que prometieren?

-Como segunda cuestión a tener en cuenta, ta l’actitú de los sindicatos presentes nes xuntes, a los que queremos alvertir de que la prioridá ye pensar na totalidá de los y les trabayadores, bien percima de caltener cuotes de poder y privilexos sindicales.

Porque’l bancu pretende remanar los drechos sindicales como moneda de cambéu ante cualquier negociación sobre despidos, baxes, tresllaos o prexubilaciones. Yera d’esperar conociendo les habituales práctiques de la patronal. Pa la CSI, los drechos na representación de los y les trabayadores tienen de respetase siempres al marxe la negociación pol emplegu y les condiciones de trabayu, y nunca como arma refundiza.

Por esta razón tenemos de tar presentes nes conversaciones, p’ayudar a que tolos y toles trabayadores recibamos información cierto sobre cuanto se fale y se decida.

Creemos tamién que la unidá d’acción col restu d’organizaciones sindicales ye la meyor manera d’axustar con fuerza ante la patronal, por eso paeznos desaveniente que nun se cunte con nós pa ello.

Dende la Corriente Sindical d’Izquierda tamos dimpuestos y dimpuestes a llegar a onde faiga falta, presentando denuncia por vulneración de drechos fundamentales, con tal de consiguir que los y les trabayadores tengan la mas completa representatividá na negociación, y vamos actuar contra toos aquellos que lo quieran torgar.

POL CALTENIMIENTU DEL EMPLEGU EN BANESTO-SANTANDER
NON A LOS CHANTAXES
POR UNA FUSIÓN ENSIN DESPIDOS NIN AMENACES
POLA EQUIPARACIÓN DE LOS Y LES TRABAYADORES DE BANESTO Y SANTANDER

CSI-GIJÓN