42 cesiones illegales y 23 despidos na RTPA

Dende la CSI tamos trabayando por que naide nesta empresa pierda’l so trabayu y por que nun síamos les trabayadores les que suframos les consecuencies d’una xestión irresponsable amás de fraudulenta. La RTPA traviesa una vegada más momentos bien delicaos nos que dende la política naide paez apostar por ella. Toles nueses actuaciones van dirixíes a defender un futuru digno y estable pa esta empresa pública.
Axuntamos una nota de prensa que faemos pública sobre la situación de fraude na xestión y les nueses reivindicaciones. Tamién vos axuntamos un informe sobre la situación llaboral na RTPA fecháu a 20 d’avientu y que por tantu nun inclúi lo asocedío’l día 31. Nél detállense les 42 cesiones illegales declaraes nos tribunales y los 23 despidos de personal de la RTPA. Estos datos tán a la espera de conocer les nueves denuncies por cesión y despidu qu’atrope la empresa en despidiendo en nuechevieya a más de 40 trabayadores.
Cabo señalar amás que dende’l 31 d’avientu la dirección d’esta casa realizó 5 contratos interinos illegales fechos a deu pa la cobertoria de vacantes y que pretende reorganizar la redacción d’informativos apriesa y corriendo. Tou ello pa faer frente a la coxuntura derivada de la xestión fraudulenta. La CSI nun puede collaborar con esta dirección en funciones nel esmantelamientu progresivu d’esta empresa pública y los nuesos derechos llaborales. Por ello esiximos un cambéu na xestión asumiendo a los vencíos illegales y nun pagando indemnizaciones o una nueva dirección.
Tamién resulta interesante informar que la dirección de RTPA encargó a Pricewaterhousecoopers una propuesta de reestructuración de la RTPA. Vamos Intentar recavar más información sobre esta multinacional pero una curtia busca per internet revela la participación d’esta consultoría na privatización de la sanidá, la corrupción política y l’ERE de Radiotelevisión de Valencia.