Contra la represión, llucha polos tos derechos

Nes pasaes fuelgues xenerales del 14 payares y del 29 marzu, 8 militantes de la CSI y 7 militantes de la CNT fueron imputaos pola so participación activa en diches fuelgues y la so defensa de los drechos de la clase obrera.
Agora ye’l momentu de solidarizanos con estes presones y demosar que les nueses meyores armes son la llucha y la solidaridá. Por ello, les organizaciones CSI, CXT, CNT-Xixón, SUATEA, FUSOA, PLATAFORMA ESCONTRA LA REPRESIÓN Y POLES LLIBERTAES, C.S. SESTAFERIA, LA SEMIENTE, ALAMBIQUE, CAMBALACHE, convocámosvos a una SELMANA DE LLUCHA coles siguientes movilizaciones:
-Llunes 10 y martes 11 d’avientu: repartida de panfletos en Xixón. Quedamos nos locales de CSI-Xixón a partir de les 18:30.
-Martes 11 d’avientu: rueda de prensa de la Plataforma contra la represión y poles llibertaes”. 12:30 h. Pza. del Conceyu de Xixón.
-Miércoles 12 d’avientu: “Pasucais escontra la represión”. Casa Sindical de Xixón. 19:00 h.
-Xueves 13 y vienres 14 d’avientu: concentraciones de sofitu a los imputaos nes fuelgues xenerales del 14 de noviembre y del 29 de marzu. Xulgaos de Poniente de Xixón. 09:00 h.

Comunicáu de la CSI

Les coses tán asina: despídennos, emprobécennos, desahuciennos, quítennos la nuesa salú, tórnennos en man d’obra analfabeta y, si protestamos, múltennos, túndennos, detiénennos y encarcélennos. Ellos son los braeros criminales.
Prefieren ver cómu nos suicidamos a protexer el nuesu drechu a una vivienda y a una vida digna. Les persones nun importen, namás son man d’obra y mercancía. Nun valimos nada.
Retayen en Sanidá y faen que perdamos la nuesa salú. Retayen n’Educación pa convertinos en man d’obra analfabeta. Retayen en Servicios Sociales y abandonen a la so suerte a quien tienen más necesidaes. Despídennos y mándennos a comer de la basoria. ¡Tán “fundiendo Asturies” y desguazando la nuesa tierra. Y agora, saquéennos les pensiones.
Seis millones de presones en paru nel Estáu español y más de cien mil n’Asturies, coles sos families, suponen la fame pa la tercer parte la población.
Banqueros, especuladores, grandes empresarios y políticos ensin escrúpulos, fáense millonarios. Ellos nunca van entrar na cárcel porque la llei y la policía protéxenlos.
Agora quieren que paguemos la cris qu’ellos crearon. El capitalismu siempres quier más y tan robándonos los drechos que la clas obrera algamó con una llucha de cientos d’años. Quieren que paguemos los platos rotos d’una cacía na qu’enxamás comimos. La mal llamada “delda pública”, ye la so delda: que la paguen ellos.
Gabino de Lorenzo y la so policía lleven la represión a niveles intolerables. Les pasaes fuelgues del 14 payares y del 29 marzu, munches persones, resultaron tundíes, deteníes y encausaes por salir a la cai a defender los sos derechos; por pidir un trabayu, por querer salir del paru y de la probeza. Tán imputaes por defender el pan y los drechos de toes y toos. Agora, nun podemos dexales soles. Hai que consiguir la so absolución y que se castigue a los braeros culpables de la cris, a quienes s’arriquecen a la nuesa costa y a quienes nos conderguen a la miseria.