Concentración pa evitar la espulsión d’Oumar Cissé

Ayeri xueves pela mañana cuatro migrantes senegaleses fueron deteníos en Ribesella acusaos de vienta illegal.” Trés d’ellos teníen papeles y fueron puestos en llibertá; el cuartu, Oumar Cissé, que tenía una orde d’espulsión previa, foi treslladáu a Xixón.
Esta mañana declaró nel xulgáu y el xuez refugó’l so internamientu nun CIE, pero la brigada d’extranxería treslladó-y de nuevu a comisaría ya informó a la so abogada d’oficiu de que pensaben mete-y nun vuelu comercial mañana.
Nesti momentu, Ana Taboada ta en contactu cola abogada pa intentar frenar la espulsión interponiendo una cautelarísima. Por que surta efectu ya incline la decisión del xuez, ye importante que Oumar vease arropáu, demostrando la so integración. Tamién ye necesario que la noticia algame espardimientu nos medios pa visibilizar el nuesu refugu a les espulsiones y a la Llei d’Extranxería.
Por tanto, dende la Ruta contra’l Rascismu y la represión, convocamos una concentración d’urxencia pa esta tarde a les 19:30h delantre de la comisaría d’El Natahoyo (Avda. de Carlos Marx, s/n, Xixón).