Llibería Central, obligada a realmitir a una trabayadora

El 22 de payares publicose la sentencia del xuiciu por despidu que la Llibrería Central de Xixón aplicó, alegando causes económiques, a una de les sos trabayadores. La titular del Xulgáu de lo social 3 declaró la nulidá del despidu, colo qu’obliga a Llibrería Central a la inmediata realmisión de la trabayadora y al abonu de los correspondientes salarios de tramitación dende la fecha del despidu, el pasáu 3 de xunetu, hasta’l día de la efectiva realmisión.
La defensa de la trabayadora basabase na vulneración del principiu de indemnidad, dao que’l despidu efectuóse como represalia escontra la trabayadora cuando ésta negábase a que los sos derechos llaborales fueren frayaos. Les presiones escontra la trabayadora agora realmitida remontense a 2010, cuando la propietaria de Llibrería Central diz-y que vaya buscando otru empléu; meses dempués, la propietaria impon-y una cambéu sustancial del horariu de trabayu, partiendo la so media xornada n’horariu de mañana y tarde. En denunciando la situación, en febreru de 2012 la TSXA falló a favor de la trabayadora; el mesmu día en que s’executó la sentencia, Llibrería Central empecipió consultes pa un ERE a cuatro persones, ente elles la emplegada despidida, a pesar de la ufierta per parte d’otra trabayadora a xornada completa d’amenorgar la so xornada a la metá tres el so permisu por maternidá, col consiguiente despidu d’esta trabayadora por non almitir la empresa l’amenorgamientu de xornada que precisaba.
Con tou esto la Llibrería Central caltien inda un ERE anque en momentos de mayor volume de trabayu en llugar de llevantar dichu ERE impon hores extres que remunera con tiempu llibre.
Frayar col clima d’impotencia creaú poles reformes llaborales
Les socesives reformes llaborales persiquen amurniar a quien quiera faer valir los sos derechos tantu como’l retayu real d’estos. El so propósitu ye crear un clima social y psicolóxico de vulnerabilidá nel que la patronal pueda obrar al marxe de la llei, tal que venía faciendo con les trabayadores inmigrantes. Por eso tien tantu valor iniciatives como la tomada pola trabayadora de la Llibrería Central: una sola persona, col sofitu solidariu d’otres -trabayen o non na mesma empresa-, puede romper cola normalidá qu’acepta los despidos como daqué natural.
Dende la CSI vamos siguir de cerca la situación por que’l cumplimientu de la sentencia suponga una meyora real de les condiciones nesta empresa y vamos tratar de que sirva como exemplu nel conxuntu del sector.