Dempués del Niemeyer igual vamos nosotros…

Los técnicos hablan de “desastre contable” en el Niemeyer y de “gastos disparatados”. Ye’l titular del sábadu de La Nueva España que bien reflexa la situación d’escándalu públicu y analís de la so xestión a la que s’atopa sometíu esti centru cultural. Por si daquién yá nun s’alcuerda, el Niemeyer foi unu de los proyectos vanguardia del nuesu ex-presidente Tini Areces, al que Los Berrones dedicáronlu con gran aciertu la tema Vicentón, que pasó más desapercibíu de lo que fuera necesariu.
Vien al casu que nós saquemos a colación la tema del Niemeyer porque xuntu col muselón, la regasificadora, el fallíu banzáu de Caliao, la variante de Payares… tamién la RTPA, la RadioTelevisión Pública Asturiana, foi unu de los proyectos identitarios del Gobiernu d’Areces.
Más tempranu que tarde, el tema la RTPA va saltar a la lluz público y volverá formar parte de les declaraciones públiques de políticos y seique tamién auditores, como agora tar siendo’l Niemeyer. Too apunta a ello, sacante tratase d’un mediu de comunicación qu’amás de tener un ferrial control sobre los sos propios informativos tener tamién sobre les cabeceres asturianes: El Comerciu y La Nueva España al traviés de contratos n’informativos precisamente. Tratar d’una torga salvable porque de tantu esconder la mugre debaxo de l’alfombra acaba abuitando tantu que daquién acabará por llevantala.
Va un añu Cayo Lara manifestábase asina de contundente en plena campaña electoral en contra de los despidos na RTPA. Como trabayadores nestos momentos echámoslu de menos, a él y al so partíu en Asturies:


Y ye qu’alleguen dellos factores que nestos momentos converten la RTPA nuna pota a presión: el Partíu Popular fuera del conseyu d’alministración; Foro Asturies deseosu de pasar factura pola so fallíu actuación contra la RTPA yá denuncia d’El Niemeyer lo mesmo que podría denunciar de la RTPA: que se punxo un serviciu públicu al serviciu de los intereses partidistes de la oposición d’aquel momentu, una situación d’estructura fraudulenta insostenible y reconocida polos tribunales, con cesiones illegales por decenes, con despidos enriba de la mesa, con un proyectu de comunicación por reconstruyir pal 2013 y con movilizaciones de los trabajadores que junto con la PAC tamos promoviendo dende la CSI pa frenar los despidos, desixir la realmisión de los compañeros y poner esti mediu informativu pagu col dineru de toos nel aldu correctu: el del serviciu públicu a Asturies y los asturianos y non de los gobiernos de vez o de los intereses partidistes de quien remana esti tinglao.
La entruga interesante ye ónde se va a asitiar cada actor nesti contestu. Nós, tener claro, onde siempres tuvimos: denunciando’l secuestru de la radiotelevisión pública, el chiringu, la precariedá llaboral y los despidos y esixendo un serviciu públicu más públicu, más de toos. Pero anque podamos presumir de cierta coherencia y dalguna llexitimidá, somos bien conscientes que la nuesa posición nesti sentíu ye necesaria pero non abondu. Hai más actores, principalmente más trabayadores, que tienen que tomar un papel activu pa defender los nuesos puestos de trabayu y esti serviciu públicu imprescindible. POdemos dicir qu’una radiotelevisión bien xestionada podría garantizar, como siempres dixeron de manera hipócrita los políticos y xestores, l’accesu a una información plural y democrático, el fomentu d’un sector audiovisual potente, el desenvolvimientu de los movimientos culturales asturianos tantu los tradicionales como los contemporaneos, la normalización de la llingua asturiana, la dinamización de la economía a munchos niveles, la cohesión y l’autoestima del territoriu… y por qué nun dicilo: contribuyir dende l’alderique sanu abiertu y plural a proponer salíes y remedios a esta estafa que llamen crisis. Toos saldríamos ganando como sociedá, en concencia.
Dellos comportamientos y posiciones son fácilmente previsibles: conocemos la postura del PP a favor de les privatizaciones de too lo público y queda constatáu con toles sos xestiones históricu y actual; prevemos les posiciones hipócrites, engañoses y remanadores del PSOE; asorar la posición d’IX, cómpliz silenciosu en tou esti tiempu de les falcatrúes asocedíes na RTPA pero que públicamente s’asitia a favor de lo público y el trabayadores ¿qué piensa de la situación actual?; abarruntamos tamién la posición de FORU, similar a la del PP, y tenemos amás la esperiencia de les actuaciones cabileñu y nefastu de Cascos, pero tenemos entá la pequena dulda de si cree que somos el trabayadores los que tenemos que pagar el coríu de la mala xestión de los sos enemigos políticos, los daños colaterales. Los sindicatos… ¿qué dicir de los sindicatos mayoritarios CCOO y UXT y el más pequenu USU, colos que compartimos mesa nel comité d’empresa? Internamente yá cononcemos les sos posiciones, pero ¿qué tienen que dicir públicamente de too lo que ta pasando?¿Qué posición va tomar el nuevu miembru del conseyu d’alministración per IX y militante hestóricu de CCOO?
Nostros, como sindicatu, pero sobremanera como trabayadores, queremos tar al pie de los nuesos compañeros defendiendo los nuesos derechos, los nuesos puestos de trabayu y el nuesu serviciu públicu. Yá tuvimos l’añu pasáu a pesar de les discrepancies de planteamientos. Siendo pocos va senos bien difícil faer d’esta empresa una radiotelevisión na que sentise arguyosu de trabayar. Y va senos bien difícil tamién defender el nuesu sustentu y la nuesa manera de vida. Ganes pa intentalo nun nos falten y nello tamos.

¡¡DESPIDÍOS REALMISIÓN!!

¡¡DEPURACIÓN DE RESPONSABILIDAES!!

Por una RadioTelevisión Pública Asturiana al serviciu de toos,

¡¡RTPA SÍ!!