La Delegación del Gobiernu y la burocracia sindical de CCOO y UXT fracasen nel so intentu de sacar de les cais al sindicalismu combativu

El 12 de payares, dos díes antes de la Fuelga Xeneral, la prensa informaba d’una xunta na Delegación de Gobiernu d’Asturies ente los dirixentes rexonales d’UXT y CCOO y el Delegáu del Gobiernu, Gabino de Lorenzo, alcalde d’Uviéu na dómina les privatizaciones xeneralizaes y la corrupción urbanística esbocada y prominente miembru del PP, partíu que, por si ye necesariu traelo a l’alcordanza, ta llevando a cabu los más brutales ataques a los drechos de los y les trabayadores nes caberes décades.
Según manifestaron los dirixentes sindicales a la salida de la xunta, fueren pidir “la collaboración de les Fuerces de Seguridá del Estáu cara al desenvolvimientu de la Fuelga Xeneral, pero polo visto, tamién fueren ufiertar la so collaboración a eses mesmes Fuerces de Seguridá del Estáu pa, ente unos y otros, algamar el común oxetivu de boicotiar l’actividá de los sindicatos combativos que, como s’anunciara con abonda antelación, convocaben la manifestación del 14-P na Plaza L’Humedal de Xixón, a les 12 de la mañana, como yá ye vezu en toles fuelgues xenerales.
CCOO y UXT convocaren díes antes la so manifestación n’Uviéu a les 7 la tarde, como asina se recoyía en cartelos, anuncios en prensa y radio y nes páxines web de dichos sindicatos. De golpe y porrazu (inmeyorable espresión, teniendo en cuenta que s’axuntaron con quien s’axuntaron) , una vegada aconceyaos col Delegáu del Gobiernu, dambos sindicatos anunciaren otra manifestación con salida nel mesmu llugar y a la mesma hora que la convocada por CXT, CNT, SUATEA y CSI y, cola arrogancia que davezu remanen nesta triba situaciones, en contraste cola humildá y la sumisión cola que se porten al respective de los poderes finacieros y políticos, llamaron a estos sindicatos a participar como convidaos na manifestación que pretendíen usurpar con tan llamentable maniobra.
Ante esta prevocación, qu’anunciaba tamién les consiguientes prevocaciones policiales, dende’l sindicalismu combativu alcordóse nun cayer nel bochornosu espectaculo d’enfrentamientos físicos ente trabayadores que buscaba la burocracia sindical nun momentu en que l’enemigu ye’l mesmu pa toos, sían les que sían les banderes detrás de les que marchemos: el capitalismu sangrín que nos lleva a una situación d’escepcional gravedá como clas obrera y como ciudadanos y ciudadanes, pero tampoco dexar la cai a quien l’abandonaren va munchos años como espaciu de griesca p’abellugase nos sos despachos subvencionaos.
Por eso, dempués d’una mañana na que la policía tundió y detuvo a dellos componentes de piquetes del sindicalismu combativu, llegando a invadir tolete en mano la casa sindical, dellos centenares de trabayadores dirixiéronse anantes de la hora de salida de la manifestación a la Plaza de L’Humedal pa torgar cola so presencia la maniobra de CCOO y UXT d’usurpar l’espaciu que, nesi día y a esa hora, nun-yos correspondía ocupar. Col pasu los minutos, la manifestación de CXT, CNT, CSI y SUATEA foi xorreciendo hasta algamar miles de participantes nel intre qu’entamó la so marcha, cuyo lema cimeru, amás de les crítiques al Gobiernu y a los responsables d’esti atracu que llamen cris, foi’l pidimientu de llibertá pa los cuatro deteníos que nesi momentu s’atopaben na Comisaría Central de Xixón.
Una vegada rematáu l’actu central y en vista de que los deteníos nun yeren puestos en llibertá, miles de presones dirixéronse en manifestación escontra la Comisaria, concentrándose frente a ella, cortando los accesos en automóvil al edificiu y les principales aveníes d’esa fastera la ciudá. Ente glayíos de sofitu a los deteníos y evitando les prevocaciones del numberosu grupu de policíes antidisturbios presentes, los y les manifestantes aguantaron más de tres hores concentraos en dichu llugar hasta que fueron puestos en llibertá los cuatro compañeros, a los que recibieron con aplausos y glayíos de solidaridá y sofitu.
Fracasada la maniobra conxunta de les cúpules burocrátiques de CCOO y UXT y del Delegáu del Gobiernu del PP, nun resulta ociosu entrugar hasta qué grau de dexeneración sindical van llegar estos personaxes, entá ye más nuna tierra como Asturies na que yá, de puru vezu, nun nos estraña ver como acostumen a dir de la manina de la patronal en negocios tan codalosos y tan pocu escamplaos como’l ACEBA (Alcuerdu pola supuesta Competitividá, el desaniciáu Empléu y el Bienestar de dalgunos) detrás de cuyo pomposu nome, amás d’aire, solo hai un mecanismu de financiamientu de los aparatos sindicales y de la patronal per parte’l Gobiernu Autonómicu de vez.
Esperemos que, más ceu que sero, les y los trabayadores solmenémonos d’enriba estes práctiques maniobreres y a estos individuos corrompíos por años d’entregues y pactos inconfesables, pa poder lluchar xuníos escontra los nuesos comunes enemigos.
Nello tamos.