Dignidá y derechos. Por un día de llucha diferente

LOS MOTIVOS

El prósimu 14 de payares de 2012 distintes organizaciones sindicales convocaron una xornada de Fuelga Xeneral. A estes altures casi resulta redundante recordar tol rosariu d’agresiones que’l pueblu (al igual que n’otros estaos europeos) vien sufriendo nos sos derechos, derechos adquiríos tres munchos años de llucha y esfuerciu.
Midíes contra’l déficit pa desaniciar conquistes y derechos. La reforma llaboral llevó a la desregulación del mercáu de trabayu, al despidu llibre, a EREs ensin control, a la eliminación de los Convenios, a amenorgamientos de salarios y ampliaciones de xornada, al fomentu de la esplotación y la desapaición de derechos, rompiendo l’equilibriu empresa-trabayador/a.
Les midíes de contención del déficit públicu que defende’l gobiernu del Partíu Popular siguen afondando nel pozu de la crisis; los pieslles d’empreses son continuos, los abandonos de les multinacionales tamién, el paru supera cualquier llende inimaxinable, unu de cada cuatro ciudadanos del Estáu españo n’edá de trabayar nun tien ocupación y unu de cada dos nuevos que busca trabayu, tampoco; cientos de miles de desahucios amuesen la quiebra social que se ta produciendo nesti país a cuenta de los de siempre. Nun se ve lluz a la fin del túnel, pero siguen tomándose decisiones qu’atenten contra’l conxuntu de la sociedá, desmontando los servicios públicos y la protección social, educación, sanidá, dependencia, precisamente cuando más se precisen p’ayudar a los más débiles, a los que más sufren los golpes de la crisis.
Esta crisis ye una estafa. Dícennos qu’estos esfuercios son necesarios pa salir de la crisis na qu’atopamos. Ye mentira. Echando mano d’un términu acuñáu na cai, hai que dicir bien alto qu’esto nun ye una crisis, ye una estafa, un robu perfectamente orquestáu. ¿Qué retayos y midíes de control tán aplicándose al sector bancariu, culpable d’esta situación? ¿Qué retayos o xubíes d’impuestos aplicar a les grandes empreses o a les grandes fortunes y patrimonios, que siguen coles mesmes escandaloses exenciones fiscales qu’antes d’españar esta crisis”? ¿Qué midíes tomar contra’l fraude fiscal nun país nel que cada añu defráudense casi 100.000 millones d’euros cuando un 70% de dicha cantidá correspuende a les grandes empreses?

EL NUESU PAPEL

Quien trabayamos nes Alministraciones Públiques tamién tamos en primer llinia del paredón, y ello por dos cencielles causes: los nuesos salarios y munchos de los nuesos derechos dependen d’una decisión llexislativa cenciella, y tamos xustu ente los grandes y voraces poderes económicos y unos servicios públicos que los estorbar y que son el so oxetivu. Asina, a les conxelaciones de sueldu siguió-yos la baxada del mesmu, les conxelaciones de plantiya primeru y l’amenorgamientu puru y duru dempués con despidos indiscriminaos de temporales ya interinos ensin cubrir les vacantes, poniendo en peligru la calidá na prestación de los servicios; agora la desapaición d’una paga estra, dexen en mínimos los díes de permisu, amenorguen la cobertoria en situación de IT, desanicien les xubilaciones antemanaes, abrasen les ayudes sociales, etc., etc., etc., derechos toos ellos consiguíos y non regalaos qu’agora vemos sumir d’un refundiu, porque nel so discursu de la crisis déxase too. Y como colofón, yá tenemos a valir los despidos colectivos na alministración, que güei afecten al personal llaboral, pero mañana pueden recayer sobre cualquier emplegáu públicu: indemnización de 20 díes per añu trabayáu con un máximu de 12 mensualidaes y a la cai.
Rescampla que nun nos falten motivos pa movilizanos y secundar tanto la Fuelga Xeneral como cualesquier otra movilización que se convoque. La pasividá ye la postrera de les nueses opciones y la fola de respuestes tien de siguir ensin fuelgu, conxugando toles iniciatives que surdan. Los vienres negros tienen de siguir; dende la Corriente siempres vimos con simpatía una movilización salida bonalmente de los mesmos trabayadores, al igual que les Asamblees de Trabayadores, nes que vos animamos a participar.

UNA LLUCHA DE TOLA SOCIEDÁ

Pero eso nun ye abondo: toes y toos tenemos de dar un pasu alantre, tanto na intensidá de la movilización como nel esfuerciu personal qu’ésta suponga. El 14-N tien de suponer una gran puesta n’escena del descontentu popular escontra les agresives polítiques neolliberales que rapiñen ensin descansu nos nuesos derechos, la nuesa salú, los nuesos salarios… polítiques qu’hipotequen les nueses vides.
Tola sociedá tien d’arreyase nesa respuesta. Y nesi sentíu cabe recordar que, por desgracia, hai un sector de la población cada vez mayor que nun tien posibilidá real de participar nuna fuelga xeneral al estilu clásicu (destinada a paralizar grandes sectores productivos). La sociedá ta camudando, y hai millones de persones que queden fuera del conteníu d’esa fuelga tradicional: cinco millones de paraos, persones que non siempres reciben un salariu (precarios, cuidadores, producción cultural, interinos, microempreses…), ames de casa, etc., etc.
Ello esixe un esfuerciu imaxinativu a toos esos sectores pa participar nuna xornada de llucha que va más allá del zarru d’empreses y l’actividá de piquetes (totalmente necesarios, per otra parte). Animamos a estes persones, pero tamién a sectores como la mocedá (asociaciones, sindicatos d’estudiantes…) o movimientos como’l 15-M, que tienen una esperiencia organizativa y movilizadora, a tomar non yá la cai d’una forma distinta, sinón inclusive a tomar la fuelga, y llogren esi día convertir nuna xornada de llucha totalmente abierta al conxuntu de la sociedá. Hai que tomar les cais y places xuntando fuelguistes y vecinos; hai que llograr que los pequenos comercios y los autónomos se sientan incluyíos na llucha d’esi día; hai que llograr que la fuelga non yá consista en nun allegar al trabayu sinón tamién en nun consumir; ye un día bien apoderáu pa denunciar énte les entidaes bancaries los cada vez más numberosos desahucios … Trátase, a última hora, de complementar la fuelga clásica con nuevos espacios de conflictu y resistencia que nun pueda xestionar el poder y el sistema.

EL 14-N SECUNDA LA FUELGA XENERAL y PARTICIPA EN CUALQUIER ACTIVIDÁ DE LLUCHA Y REIVINDICATIVA