La CSI demanda al Gobiernu asturianu l’adelantu la paga extra

Con fecha de 17 d’ochobre del 2012, la Corriente Sindical d’Izquierda de l’Alministración Autonómica, dirixóse al presidente del gobiernu asturianu, Javier Fernández Fernández, solicitando l’adelantu de la paga estra d’avientu a tolos emplegaos públicos nos siguientes términos:
“Que coles mires de minimizar l’impautu económicu que va suponer nel bolsu de los emplegaos públicos asturianos la supresión de la paga estra de Navidá ordenada pol gobiernu col Real Decretu-Llei 20/2012, de 13 de xunetu, desarrolle fórmules como la usada pol gobiernu foral de Navarra, y les propuestes en dellos Conceyos de distintes comunidaes autónomes, y facer posible que n’Asturies s’adelante a los díes (a manera d’exemplu, 3 de xineru y 3 de xunetu) el cobru de les pagues estraordinaries de los emplegaos autonómicos ente 2013 y 2015, lo que se realizaría ensin medría presupuestaria.
Que se realicen tolos informes y estudios que sían necesarios p’aplicar na alministración autonómica del Principáu d’Asturies, el “modelu navarru” sobre les pagues estres, y s’entame un procesu negociador pal periodu 2013-2015 que dexe recuperar les cuantíes detrayíes nel añu en cursu cola supresión de la paga estra, y minimizar la so repercusión nos mesmos trabayadores y nel texíu social asturianu.
D’esta miente, búscase garantizar el cumplimientu de la llei, pero tamién que los emplegaos públicos nun tengan un amenorgamientu real d’ingresos, y desaniciar asina los efectos de la suspensión obligatoria de la paga estraordinaria del 2012 decretada pol gobiernu, nel conxuntu de la sociedá asturiana al amenorgar hasta nun 20% el poder adquisitivu de trenta y cinco mil families.”
El pidimientu comunicóse tamién a tolos grupos políticos con representación na Xunta Xeneral del Principáu d’Asturies, pa la so conocencia y solicitando qu’esta demanda del nuesu sindicatu y del conxuntu de los emplegaos públicos, se vea sofitada poles actuaciones dende los grupos parllamentarios.
La oposición a los retayos llaborales, sociales, económicos y políticos que nos últimos tiempos venimos sufriendo’l conxuntu de los trabayadores, y en particular los emplegaos públicos, nun tien de ser encarada namás con declaraciones d’intenciones sinón con fechos tanxibles, siendo amás difícil de xustificar que nun se decidan midíes de calter social que nun supongan medría del gastu públicu.
Abútamos que’l gobiernu asturianu, que nes sos declaraciones públiques opónse a la política de retayos del gobiernu central, tien agora una oportunidá escelente de desaniciar en cierta midida una de les múltiples agresiones que venimos sufriendo los emplegaos públicos nos últimos años, y dexar de ser corresponsable, como vien siendo, de les midíes qu’ellos mesmos critiquen.