Convocatoria del sindicalismu de clase y alternativu pal 14P

Les organizaciones sindicales que firmamos abaxo dirixímosmos a tolos y toles trabayadores, n’activu y desemplegaos/es, estudiantes, pensionistes, colectivos de desahuciaos/es, inmigrantes y componentes de movimientos sociales pa manifestar que:
Convocamos fuelga xeneral llaboral, social, política y de consumu pal 14 de payares que vien, al tiempu que valoramos positivamente l’ámbitu européu d’esta convocatoria. Consideramos qu’esti fechu ye la consecuencia d’una demanda reiterada dende’l sindicalismu de clas y alternativu como lo manifestamos espresamente na xornada estatal de llucha del 26 de setiembre pasáu y amás vieno siendo un clamor xeneral nes manifestaciones y fuelgues que percuerren tol Estáu y los países de la periferia europea.
Nestos momentos tamos asistiendo a un procesu aceleráu de deterioru de les condiciones de vida y de trabayu y tamién a una perda creciente de drechos y llibertaes. Pa ello ta usándose la ferramienta de la delda pública cola finalidá de deteriorar y privatizar tol sistema públicu.
Les polítiques llevaes a cabu polos gobiernos del PSOE y del PP y de los sos socios empobináronmos a esta situación d’emerxencia social. Polo tanto, dende’l sindicalismu de clas y alternativu nun vamos propiciar l’apuntalamientu del sistema capitalista con parches o midíes parciales; al contrario, pronunciámosmos pola llucha y la movilización como elementos fundamentales de tresformación social, frente a les imposiciones de la Troika (FMI, BCE y Comisión Europea) y a les polítiques de los gobiernos estatal y autonómicos que, de rodiyes, asúmenles ya impónenmosles.
Siguimos oponiéndomos a les polítiques sindicales de concertación social (representaes por CC.OO y UGT) que vien trayendo consecuencies tan desastroses a lo llargo d’años pa la mayoría de la población. Reiteramos que’l referéndum nun se pue usar como una ferramienta de desmovilización nin muncho menos pa solicitar un gobiernu de concentración nacional. La voluntá popular ta espresada por demás nes movilizaciones y nes cais.
Oponémosmos a la xuba del IVA, que castiga sobre manera a la población que destina la totalidá de los ingresos al consumu d’alimentos básicos. Denunciamos que’l dineru destinao al rescate del sistema financieru se saque a costa de los contribuyentes, incluso percima de lo presupuestao pa los servicios públicos, talo qu’alcordaron PSOE y PP cola reforma constitucional de setiembre del 2011.
Asistimos a una estafa descomanada, que tenía de tener consecuencies d’enxuiciamientu y alcárcel pa los culpables d’esta situación. Esiximos una auditoría de la delda.
Dende’l sindicalismu de clas y alternativu apoyamos los procesos asamblearios y les lluches impulsaes poles plataformes ciudadanes que defenden valores solidarios, d’oposición al sistema capitalista actual y de construcción d’un modelu social, políticu y económicu nuevu al serviciu de los intereses xenerales. Escontra’l mieu, hai que responder cola unidá y la llucha.
Consideramos imprescindible proponer, de manera coordinada, un calandariu de movilización permanente que busque unificar les lluches diverses, recoyer les propuestes feches dende los movimientos de base y asamblearios y, en definitiva, crear condiciones favorables pa esta convocatoria nueva de Fuelga Xeneral del 14 P, primero de l’aprobación de los próximos Presupuestos Xenerales del Estáu. Énte’l más que probable rescate, namás retrasáu por intereses electorales, y que va suponer más midíes de recortes sociales y llaborales y más perda de soberanía, vamos siguir entamando movilizaciones contundentes y masives con tolos sectores afectaos.
Esiximos la derogación de tolos decretos (reformes llaborales y recortes salariales, recortes en sanidá, n’educación, servicios sociales, midíes fiscales, rescates financieros, reformes xudiciales, drechos vulneraos de les persones inmigrantes, reformes y recentralización de les alministraciones públiques…) por considerar qu’atenten escontra los drechos y llibertaes de la clas trabayadora y de la sociedá en conxuntu y beneficien namás a los poderes económicos. La defensa inequívoca de los servicios públicos ye una garantía del caltenimientu de los drechos de la ciudadanía.
El sindicalismu de clas y alternativu que representamos apoya la llucha de les y los trabayadores de la minería, del tresporte, del campu andaluz (derogación de la esixencia de les 35 peonaes pa cobrar el subsidiu), de los y les estudiantes y AMPAs, etc.; y tamién les últimes movilizaciones del 25-S, que demuestren que sectores populares amplios tán un pasu per delantre de les estructures sindicales y polítiques del sistema.
Por too ello, plantegamos:

  • Nun pagar la delda nin los intereses. Esiximos una auditoría de la mesma y penes d’alcárcel pa los culpables. Esiximos la nacionalización de la banca y la creación d’una banca pública.
  • El nuestru desalcuerdu col armamentismu creciente, y reafirmámosmos nel NON a la OTAN.
  • Refugamos dafechu les midíes represives que, de manera creciente, se vienen tomando escontra los y les activistes sociales y sindicales que s’oponen a les midíes del gobiernu.
  • Escontra la reforma llaboral y escontra los recortes salariales.
  • Negativa a siguir solicitando dineru pa dedicalo al sistema financieru.
  • Defensa de los servicios y empreses públiques (y tamién de la tierra público y otros bienes). Non al so deterioru nin a la so privatización.
  • Reforma Agraria YÁ.
  • Persecución del fraude fiscal. Non a les amnistíes.
  • Pola igualdá de drechos de les persones inmigrantes.
  • Pola llaicidá del Estáu.
  • Escontra la esclusión social y la probeza. Esiximos una renta básica que garantice alimentu, agua, melecines (sanidá), llibros (educación y cultura) y vivienda.
  • Dimisión del gobiernu central y de los respectivos gobiernos autonómicos, y tamién de cualquier otru que tea al serviciu de la Troika, por ser illexítimos, yá que les sos midíes atenten escontra los intereses xenerales de la población.
  • Construcción d’una alternativa social y política, de democracia directa, que defenda los intereses de les clases populares.
  • L’establecimientu d’un salariu mínimu y una pensión mínima que permitan vivir dignamente.

Por too ello, llamamos al conxuntu de les y los trabayadores, persones en paru, pensionistes, estudiantes, colectivos de desahuciaos/es, inmigrantes y componentes de movimientos sociales pa que participemos nos procesos de debate y movilización pa consiguir que la fuelga xeneral del 14 de payares sía eficaz, sía una fuelga llaboral, social, política y de consumu, y consiguir parar los recortes y el saquéu de tolo público.
Tamién facemos un llamamientu a toles organizaciones pa siguir movilizándose en pasando’l día 14 de payares, pa da-y continuidá a la fuelga xeneral y qu’ésta consiga los sos oxetivos.

Confederación Intersindical, Confederación Sindical Solidaridad Obrera, Corriente Sindical d’Izquierda d’Asturies (CSI), Intersindical de Aragón, Intersindical Alternativa de Cataluña (IAC), Intersindical Canaria, Sindicato Andaluz de Trabajadores (SAT), Sindicato de Comisiones de Base, Alternativa Sindical de Trabajadores, Coordinadora Sindical de Madrid, Movimiento Asambleario de Trabajadores de la Sanidad, Central Sindical Unitaria.