Valoración xornada de la fuelga 19-O

La xornada de fuelga del día 19-0 supunxo xubir un pasu na llucha contra los despidos. Lo primero estimar el siguimientu recibíu per gran parte de la plantiya, según tamién les amueses de sofitu que nos daben trabayadores subcontrataos, d’otres empreses y compañeros qu’entraron a trabayar. Nos piquetes informativos participaron trabayadores despidíos y n’activu en HP, afiliaos de CCOO, UXT y restu de sindicatos de la empresa.
La participación foi irregular y bien similar en dellos centros a la rexistrada mientres la última fuelga xeneral. Centros como’l de Zaragoza HPO llegaron al 80% en determinaes árees y turnos, cifrándose’l total nun 65%-70% de siguimientu. HPO Uviéu rexistró ente un 75% y un 85% de participación mientres qu’en Consultoría rondaría’l 20%. En Llión hubo grupos con un 100% de siguimientu amás d’un actu de protesta al que se sumó la práctica totalidá del turnu de mañana; en Consultoría de Zaragoza y St Cugat el siguimientu valórase n’alredor del 30%-50%, en Zaragoza incorporáronse más trabayadores que na última fuelga xeneral pero’l boicó de dellos delegaos contrarrestró esi aumentu. En St Cugat Consultoría rexistró un descensu al respective de la participación habitual por cuenta de bien fuertes presiones por migraciones de Caixa.
Sosprendió la presencia de delegaos sindicales que nun tienen por costume trabayar los vienres, animámos-yos a que lo faigan tamién los vienres que nun haya fuelga.
Nos centros ensin representación de les secciones sindicales que tán defendiendo los puestos de trabayu col esfuerzu que toos podeis ver, destacar l’exemplu de munchos compañeros que lu realizaron a pesar del boicó unviáu a la plantiya dos díes antes.
La fuelga ye un momentu de máxima presión de los trabayadores nes sos reivindicaciones: Constatáronse impactos directos en veceru dende’l centru de Llión y de Zaragoza. Sales semi-vacíes y departamentos enteros ensin serviciu. Centenares de compañeres secundando en tol Estáu y una respuesta más que satisfactoria a pesar de toles torgues. Nel restu de Consultoría y Outsourcing distintos pidimientos ensin atender dependiendo del departamentu.

L’aición sindical va siguir y de forma más decidida

La fuelga cuntó con una gran torga: mandaron una nota dos díes antes onde delegaos sindicales anuncien que van dir a trabayar, como si tal cosa, nuna fuelga contra despidos, buscando l’efectu que cualesquier pue pensar. Nun atopemos casos similares na hemeroteca.
Esti fechu pergrave foi echáu voz de los sos sindicatos y federaciones por medio d’una carta pa que contestten como consideren oportunu. Esperamos nun se repita. Como despliquemos, nós sofitamos cualesquier movilización que realice cualesquier sindicatu presente en HP en defensa de los puestos de trabayu o na meyora de les sos condiciones. Esos delegaos, non.
Tamién la empresa fixo la so parte: Mandar trabayu al estranxeru, cambiar l’horariu de trabayadores subcontrataos, presiones a determinaos trabayadores de Consultoría, etc. Toes estes actitúes van denunciase énte la llei y los veceros.
Esta fuelga, tres una llarga acción sindical de dos años, ye un pasu nuevu d’una llucha cada vez más decidida. Vamos trabayar por que na siguiente, si ye menester, se xuba otru pasu y mos sumemos centenares más. Los alcuerdos nun llueven del cielu, o de nun faer nada en nueve meses o boicotiando fuelgues. Si fuisti a trabayar condicionáu pol boicó realizáu, apara un momentu y cavilga: la inacción nun va sirvir pa protexer el to trabayu. Eso namás se lo puen permitir dalgunos que, dende una posición segura, en cuenta de defender los tos derechos dedíquense a faer el xuegu de la empresa.
Ye menester siguir lluchando y siguir estendiendo la UNIÓN de tolos TRABAYADORES. TU y exemplos como’l que diesti’l día 19, o como tu que nos felicitasti na entrada al centru pero entrasti fadiáu porque t’afectó’l boicó de quien nun se mueven.
Mañana vamos repartir un documentu de reflexón. Lléilu atentamente, el to futuru bien val cinco minutos.
La llucha sigue:
– Güei mandemos una carta al vicepresidente Enrique Solbes solicitando la so intervención directa como persona con capacidaes executives. Paezmos que RRHH tien una capacidá escasa pa valorar beneficios y perxuicios de tener un alcuerdu o nun lu tener.
-Esti vienres, en dellos sitios, siguen les protestes. Selmana tres selmana.
Nun tengas duldes, CXT, CSI, UXT en Llión y toes aquelles secciones que vaigan sumando sofitos siempres se van poner acordies con quien sía pa defender el to puestu de trabayu, nunca pa nun actuar o pa influyir por qu’aceptes el to propiu despidu y tener asina una vida plácida como delegáu sindical.
Norabona a tolos compañeros y recordavos qu’esti vienres vamos siguir movilizándonos, pasu a pasu, cada vez con más fuercia hasta faer respetar los tos derechos, los nuesos derechos.
Cualquier dulda o entruga que tengas, faí-yla saber a cualquier delegáu o nel nuesu buzón.