El conceyu xeneral de trabayadores de Caxastur alcuerda entamar movilizaciones xunitaries

El conceyu de trabayadores de Caxastur axuntó’l 20 d’Ochobre en Xixón a 450 trabayadores de la entidá que manifestaron el so «refugu absolutu» a los axustes anunciaos pola dirección de Liberbank (grupu al que pertenecen al pie de Caja Cantabria y Caja Estremadura), tal que yá fixeren los sindicatos CSI, CC OO, CSICA y STC, convocantes del alcuentru.
L’asamblea adoptó una resolución na que los trabayadores aconceyaos alcordaron:
– Manifestar el nuesu absolutu refugu a los brutales retayos anunciaos pola dirección, basaos en cifres falseaes y que solamente busquen, gracies a esti descaráu atracu a los trabayadores xuntu cola lliquidación del patrimoniu de Caxastur, da-y continuidá al poder de Manuel Menéndez, responsable directu de l’actual situación de la entidá.
– Desixir a los grupos políticos del Parlamentu Asturianu una investigación sobre la xestión que llevó a la Caxa a la so actual situación.
– Desixir la inmediata intervención de les autoridaes monetaries, la destitución del equipu directivu de Caxastur y la consiguiente depuración de responsabilidaes.
– Entamar un procesu de movilizaciones pa torgar tantu la lliquidación de Cajastur como la implantación d’esti plan d’axuste que, lloñe de caltener l’empléu como cínicamente afirmen los sos impulsores, solamente busca crear, al mediu plazu, les condiciones pa despidos masivos, más baratos y ensin posibilidá de reacción per parte de los trabayadores.
– En vista de la gravedá de la situación y de l’almaresía d’esta inxustificada agresión a los trabayadores, esti aconceyamientu considera que cualquier métodu de defensa de los nuesos derechos y del futuru de la Caxa ye lícitu y lexítimu.