Por un serviciu públicu de calidá nes piscines municipales d’Avilés

La Corriente Sindical d’Izquierda fai públicu esti comunicáu pa denunciar el deterioru que la Fundación Deportiva Municipal d’Avilés ta provocando nel serviciu publico que s’empresta nes piscines municipales del conceyu. Cambeos d’horarios constantes y arbitrarios, cambeos de conteníu, eliminación de niveles d’aprendizaxe o agrupamientos con una ratio alumnu/profesor cada vez mayor son dellos exemplos de cómo la FDM va deteriorando progresivamente esti serviciu municipal.
A manera d’exemplu, asocede lo mesmo que si un colexu o centru educativu camudara costantemente l’horariu escolar, aumentara’l númberu d’alumnos per profesor y entemeciera nuna sola clase a alumnos de distintos niveles educativos. En delles ocasiones llegar a la simple eliminación, ensin nengún tipu de criteriu, de grupos que funcionaben a plenu rendimientu.
Al respective de la campaña escolar, les coses nun tán meyor. Estremáronse les clases en dos, obligando a los colexos afectaos a perder hasta trés y cuatro hores nuna mañana, tou ello cola escusa d’una supuesta falta de personal.
La consecuencia de too ello ye l’abandonu de los cursinos y la perda constante d’usuarios y usuaries. Y, darréu, los responsables de la FDM utilicen esti abandonu como esculpa pa rebaxar les hores de contratu de dellos trabayadores, movelos a otres instalaciones o, cenciellamente, prescindir d’ellos. Magar tou ello, el númberu de personal directivo y les sos soldaes sigue creciendo esponencialmente.
Na CSI consideramos que toes estes circunstancies nun lleven a otra consecuencia que al deterioru del serviciu públicu de les piscines, a la perda d’empléu y al empeoramientu de les condiciones llaborales de el trabayadores y trabayadores.