Ocupación de la sucursal de La Caixa polos impagos de Naval Xixón

Un grupu de prexubilaos de Naval Xixón ocuparon güei mientres más de dos hores una sucursal de La Caixa nesta ciudá pa desixir el pagu de los salarios atrasaos que fueron alcordaos nel espediente d’estinción d’actividá del astilleru peslláu en mayu del añu 2009.
La protesta forma parte del calendariu de movilizaciones aprobáu polos sindicatos CCOO, UXT y CSI en respuesta al impagu de complementos de les prexubilaciones, del que responsabilicen al Gobiernu d’Asturies y al ente Pequenu y Medianu Astilleros en Reconversión (Pymar)
La Caixa, al traviés de l’aseguradora Caixa Vida, tendría d’abonar esos haberes pero nun lu fai al escarecer de documentación de la Conseyería d’Industria como garantía de pagu per parte de l’Alministración rexonal, según informó güei el dirixente de la CSI Cándidu González Carneru.
Los prexubilaos entraron a les 11.30 hores na see de la entidá bancaria y permanecieron mientres más de dos hores hasta que forzaron una xunta cola directora d’Área, Alicia Mas.
Al rematar la xunta, los representantes sindicales aseguraron que la entidá bancaria y l’aseguradora “nun tienen responsabilidá nenguna” nel impagu porque “tán esixendo a l’alministración la mesma documentación qu’esixen en tolos casos d’espedientes de regulación d’empléu”.
González Carneru responsabilizó al nuevu presidente de Pymar, Álvaro Plateru, y al conseyeru d’Economía y Empléu del Princioado d’Asturies, Graciano Torre, por retrasar la tramitación del espediente y bloquiar el pagu de los haberes.

Fonte: EFE