Prexubilaos de Naval Xixón ocupen la Conseyería d’Economía

Una docena de prexubilaos de Naval Xixón, trés representantes de cada unu de los sindicatos CCOO, UXT y CSI, fueron desaloxaos esti martes de la Conseyería d’Economía y Empléu, onde pretendíen protagonizar un encierru a la espera de que se resolvieren los impagos del astilleru. L’oxetivu yera tamién forzar una xunta col titular de la Conseyería, Graciano Torre, conseyeru de la mesma en Pymar (Pequeños y Medianos Estelleros en Reconversión), confirmaron a Europa Press fontes sindicales.
Les mesmes fontes señalaron que foi’l mesmu Torre quien ordenó la espulsión y criticaron qu’esti nun sala “a dar la cara”, según la so “actitú chulesca que ye propiu d’incapaces”, indicaron, antes d’aprofiar que’l conseyeru nun sabe imponese en Pymar y paez ayenu a una situación que ye “angustiosa” pa munches families, una y bones dalgún lleva inclusive dende xineru ensin cobrar. “Ye l’únicu estelleru nel que pasa esto”, remarcaron.
La midía de protesta foi aprobada esti martes n’asamblea y, mientres unos fueron hasta la Conseyería, otros concentráronse a les puertes del Parlamentu asturianu. Los prexubilaos van volver a les movilizaciones esti miércoles, dempués de l’asamblea que va tener llugar na Casa Sindical a les 11.00 hores.
Los afectaos, 24 hasta la fecha anque van poder ser munchos más si nun se pon solución, pregúntense que pasa col dineru de la póliza que tien de pagar les sos pensiones y que vien de les sos indemnizaciones tres el zarru del astilleru. “Si ye nuesu, ónde ta”, preguntáronse, antes d’apuntar que “raspia’l delitu lo que tán faciendo políticamente”.
El problema anicia en que los que lleguen a los 60 años tendríen de pasar a percibir les ayudes previes de la Seguridá Social a la xubilación, que tienen de ser solicitaes por Naval Xixón, daqué que nun ta asocediendo. Los impagos algamen 1.250 a 1.400 euros al mes.

Fonte: EL COMERCIO.