La CSI desixe la dimisión de Menéndez al mandu de Caxastur

Énte la publicación de los resultaos de les auditoríes sobre la situación de les entidaes financieres españoles, que cifren en 1.198 millones d’euros les necesidaes de capital de Liberbank, la sección sindical de la Corriente Sindical d’Izquierda (CSI) en Caxastur manifiesta lo siguiente:
Estos resultaos ponen de manifiestu la nefasta xestión de Manuel Menéndez, presidente de Caxastur dende 1995 y anguaño presidente del bancu priváu Liberbank, resultante de la fusión y privatización de Caxastur, Caxa Cantabria y Caxa d’Estremadura. Esta xestión, marcada pol autoritarismu, l’escurantismu y la defensa d’intereses particulares en perxuiciu de los intereses d’Asturies, tien de ser investigada y tienen d’esclariase los motivos que llevaron a Caxastur a la so situación actual. Actuaciones como la compra de CCM y el financiamientu d’operaciones amestaes a la más feroz especulación urbanística (como’l casu de La Talá) tienen de ser esclariaes y tienen de derivase les responsabilidaes de quien, dende la cúpula directiva de Caxastur, tomaron decisiones d’esti tipu, que supunxeron un fuerte frayamientu pa la entidá. La situación actual pon de relieve l’espoliu que supunxo la privatización de Caxastur y l’escándalu que supón el blindaxe nos sos cargos directivos y l’acumuladura de salarios descomanaos por parte de Manuel Menéndez, que’ tien como interés únicu en tolos procesos de fusión de Caxastur el caltenimientu de la so cuota de poder personal y de les retribuciones inherentes a esi poder. La intención, anunciada pola dirección de Liberbank, de dar na venta d’activos pa torgar la intervención del FROB, supón una vuelta de tuerca más nel espoliu de Caxastur, liquidando a toa priesa bienes ya inversiones que son frutu del aforru de xeneraciones d’asturianos porque Manuel Menéndez pueda siguir exerciendo’l control absolutu de Liberbank.
Énte esta situación, la CSI desixe’l cese inmediatu de Manuel Menéndez y el so equipu directivu y que se depuren les responsabilidaes de los que, cola so xestión, tresformaron Caxastur, una entidá de caracter benéficu social con más de 130 años d’hestoria, nun bancu priváu de futuru inciertu.