Gabino de Lorenzo intenta illegalizar la manifestación xunitaria del 26S

Gabino de Lorenzo, Delegáu del Gobiernu en Asturies, ta intentando illegalizar la manifestación convocada pa güei, 26 de setiembre, en Xixón, polos sindicatos CSI, CGT, CNT y SUATEA.
Esta mañana, representantes de la CSI repondieron a una citación na Comisaría de Policía, onde se-yos dixo que Delegación de Gobiernu nun dexaría la salida de la manifestación. Presentaos los permisos y “papeles” reglamentarios, debidamente rellenaos en tiempu y forma, la Policía unvió-yos a Delegación de Gobiernu. Los responsables de la CSI mandaron la documentación a Delegación de Gobiernu y atópense a la espera de contestación.
Pa la CSI, esto nun ye más qu’una maniobra de Delegación de Gobiernu que, ante la tensión provocada pola brutalidá policial ayeri en Madrid, la fuelga xeneral en Euskal Herría y la convocatoria, pa güei, d’un día de llucha en tol Estáu, pretenden afogar les protestes populares con artimañas pseudo-llegales condergaes, de mano, al fracasu.
Dende la CSI dicimos: ¡LA MANIFESTACIÓN VA FAESE SÍ O SÍ!. ¡ESTA TARDE, A LES 19:30 h., TOES Y TOOS NA PLAZA DE LA FUELGA DE XIXÓN!.
¡POLOS DERECHOS DE LA CLASE OBRERA!. ¡POLOS DERECHOS DEL PUEBLU!. ¡ACABEMOS COL CAPITALISMU D’UNA VEGADA POR TOES!.