Concentraciones nes tiendes de calzaos MaryPaz

Esta empresa de calzaos con más de 370 tiendes en tol Estáu (menos nel País Vascu porque’l director nun quier por motivos políticos) ye tou un exemplu de cómo crear una cadena d’establecimientos y forrase a cuenta de mercar el calzáu en china y depués vendelo equí como productu nacional y d’última moda.

Conveniu inesistente, beneficios garantizaos

Por que el beneficiu sía entá mayor, nun-y queda otra opción qu’abaratar los costos de les sos emplegaes, aplicando un conveniu que nun esiste, y que ye muncho más baxu qu’el del comerciu, p’asina pagar unos 200 euros menos a cada emplegada (si multiplicáis 200 € al mes per una media de 4 moces per tienda, por 370 tiendes, podéis faer una idea de lo rentable que-y sale la xugada).

Rebaxes tol añu nes condiciones llaborales

Amás de lo que los roba mensualmente de salariu, les condiciones llaborales son penoses, toes tienen contratos temporales y pa que nenguna adquiera la condición d’indefinida, la empresa ta montada como un grupu enorme de sociedaes llindaes y dedíquense a contratar 6 meses con una SL y depués pasen a otra otros 6 meses.
De xacíu, como toes tán temporales les que reclamen daqué van a la cai (fin de contratu), les que se quexen peles hores extras a la cai, les que cueyen la baxa a la cai. Solo tienen tres semana al añu de vacaciones, la 4ª selmana nin se paga nin s’esfruta, y quien la reclama va a la cai.
Cuando hai que preparar rebaxes tóca-yos faer hores extras que nin se paguen nin se coticen, cuando abren los domingos páguenlos a 7,5 euros les hores y en negru (nada de pagar les hores extras a lo que marca’l conveniu y nin falar de cotizales). Toles tiendes tienen cámares de vixilancia por onde les controlen mientres tola xornada.

Selección racista de personal

Per otru llau, el perfil de moza ye bien claro, quieren moces nueves que sían de nacionalidá española y blanques, los curriculums de xente estranxero tienen orde de tiralos a la basura, igual que los curriculums de moces d’equí que sían de color.

Boicó a calzaos MaryPaz

Pel momento, CGT impulsó xuntu con el trabayadores cuantro aiciones de protesta delantre de la tienda que la cadena tien n’Avilés na cai la Cámara 22 partiendo octavielles y animando a la xente a que nun merque nesa tienda. La respuesta de la ciudanía ye positiva y la mayoría de persones nun entren, permaneciendo la tienda vacía la mayor parte del tiempu que duren les protestes.
Como n’otres ocasiones, la CSI-Uviéu anima a participar na protesta y estender el refugu a esti tipu de práctiques empresariales, llamando tamién a realizar un consumu responsable per parte de la población trabayadora.