Naval Xixón incumple los sos compromisos tres el pieslle

Decenes de prexubilaos de Naval Xixón lleven ensin cobrar les sos pensiones, en dellos casos, dende xineru. La situación empieza a ser bien grave y la responsable ye PYMAR que se niega a faer efectivu’l pagu.
Los afectaos son xubilaos de Naval Xixón que al llegar a los 60 años pasen a percibir les ayudes previes de la Seguridá Social a la xubilación, que tienen de ser solicitaes por Naval Xixón. Sicasí, dende xineru la empresa naval nun la ta faciendo, polo que los afectaos nun tán recibiendo’l dineru de la Seguridá Social.
La xustificación de la empresa ye qu’hubo un cambéu nel alministrador únicu de Naval Xixón y este ye una persona d’avanzada edá que se punxo enfermu, d’ende que nun fixera los trámites. Sicasí, la verdadera razón que tien que ver colos cambeos na reforma de la Seguridá Social, qu’obligaríen a la empresa a asumir un mayor costu del apautáu na póliza que se robló cuando s’alcordaron les xubilaciones.
Per otra parte, ye importante recordái que Naval Xixón foi condergada ayeri a pagar 29.000 euros a la CSI por discriminación sindical.