Nuevu cursu escolar: retayos van, retayos vienen

El cursu entama protagonizáu polos retayos na enseñanza pública derivaos del decretu de mayu y desenvueltos n’Asturies pol nuevu gobiernu.
La conseyera maniobró bien cucio pa consiguir el titular de prensa. La primer convocatoria d’esti añu supera en númberu de places a la del añu anterior, el fechu oxetivu da a entender al profanu que nun hai retayu. Nesta convocatoria d’agostu salen places que, como les d’Educación d’Adultos o enseñances especiales, dexaron pa setiembre nel cursu pasáu, amás d’añader a la cuenta places pantasmes, de fechu la ufierta inicial de 1920 queda en 1819 axudicaciones. Nes dos primeres convocatories, l’añu pasáu ufiertáronse casi 2400 places y anguaño van ser 1900 más les que saquen en segunda. Falta un datu pa faer comparanza, pero suponemos que la mayor parte de les places yá tán axudicaes asina que retayu de puestos hai. El titular yá ta algamáu y posiblemente la segunda convocatoria nun tenga’l mesmu impactu mediáticu que la primera.
Los retayos al colectivu interín nun tan namás na diferencia ente convocatories. La conseyera decidió desaniciar el derechu a la prórroga’l branu. Esto, sumao al desaniciu de la estra d’avientu determina retayos salariales d’hasta’l 25%. Prefirió cutir a los más débiles y concentrar el retayu en menos bolsos. La precariedá avanza ente los y les trabayadores de la enseñanza. El colectivu interín va representar nesti cursu casi la cuarta parte del total, de la mesma, la tercer parte de les places son a media xornada, qu’en secundaria pasa a pagase al 50 % del sueldu converxendo con primaria nel mierdaeurismu. Nos centros educativos hai cientos de docentes ocupando vacantes que ganen menos de 12000 € brutos añales.
Nun sabemos de qué manera desenvolveránse les sustituciones demientres el cursu, si van aprovechar el retrasu de 10 díes llaborales que plantega’l decretu pa sumar al retrasu que yá tenía’l procesu n’Asturies. ¿Van pasar 3 selmanes ente baxa ya incorporación? ¿Hai voluntá de sustituyir a los xubilaos? ¿Van cesar les sustituciones un mes enantes de la fin del trimestre? El retrasar una selmana la primer convocatoria de setiembre ye una declaración práctica d’intenciones.
El nuevu cursu entama cola plantiya recortada y colos derechos llaborales recortaos. Menos sueldu y mayor carga de trabayu, esi ye’l resume pa tol coleutivu docente. Que’l retayu podría ser mayor rescampla, marxe teníen. Podríen xubir les ratios pero namás camudaron les d’Infantil de 3 años. Podríen desaniciar toles midíes d’atención a la diversidá pero a la fin caltienen la mayor parte. Dalgún frutu tien que dar la llucha, les nueses movilizaciones dexaron que se visualizara l’amenaza y el gobiernu tuvo que s’esforciar en faer creyíble eso de que pa ellos la educación ye una prioridá. Esto nun tien que sirvir pa fianos d’ellos y dexar que xestionen como-yos paeza, a la escontra, la conclusión tien que ser otra: lluchar ye una necesidá y amás da resultáu. Vamos tener que siguir movilizándonos porque van venir con nuevos axustes y porque nun podemos arrenunciar a lo perdío.
Otra amenaza que pesa sobre la enseñanza pública ye la “redefinición del mapa educativo” la “eliminación de duplicidades” a que se refier el plan d’axuste. Paez deducise una intención de zarrar centros educativos de pocu alumnáu na zona rural o axuntar centros nes ciudaes. Nesti cursu plantégase la renovación de conciertos, ye’l momentu de plantegar una llucha clara escontra la concertación cola enseñanza privada. Aules que se zarren na pública mientres s’abren nueves aules nel centru concertáu vecín, esa ye la duplicidá que tenemos de combatir.
A lo último, un nuevu frente de llucha ábrese. Tenemos d’entamar l’alderique al rodiu el proyectu de llei orgánica del PP, la LOMCE. La so propuesta supón l’amenorgamientu del númberu de materies, la eleición temprana d’itinerarios, l’establecimientu de reválides qu’acuten l’accesu, l’impulsu a la privatización de la enseñanza…
Con éses, tenemos munchos frentes de batalla. Ye necesariu caltener ya impulsar los movimientos de base que se dieron nel cursu pasáu y confluyir colos que se tán formando n’otros coleutivos. Tenemos de dir texendo aliances na defensa de los servicios públicos y contra los retayos.