Homenaxe a Luciano Romero

L’Asociación Asturiana Gaspar Garcia Llaviana, l’Asociación Pueblo y Dignidá y el COSAL (Comité de Solidaridá con América Llatina) convidámosvos a participar nun pequenu homenaxe a un lluchador consecuente y a una gran persona: Luciano Romero, el sindicalista colombianu, asesináu’l 11 de Setiembre del 2005 na so ciudá,Valledupar-Colombia.
L’actividá tendra llugar nel CENTRU MUNICIPAL DEL LLANU, SALA 4 (C/Rio d’Oru,nº37-Baxu, Xixón), a les 19:00 h. (tambien tien otra entrada pola Avda. del Llanu, frente a la piscina municipal).
Intervendran :
-Lola Villacob de la FCSPP de Colombia (Fundación Comité Solidaridá con Presos Politicos)
-Un Colombianu/a,del Colectivu Luciano Romero, entá ensin determinar.
-Va proxectase un pase de diapositives de semeyes de Luciano y una esposición de fotografias sobre Colombia Luciano

Luciano Romero

Romero Molina tuvo ente nós los últimos meses del añu 2004 y los primeres de 2005, fuxendo de les amenaces de muerte de grupos paramilitares en Colombia. Vinu nel Programa de Derechos Humanos del Gobiernu d’Asturies. Yera un trabayador de Nestle y fuera despidíu por denunciar los abusos de la empresa colos trabayadores. Equí arreyóse tamién nes actividaes y protestes que nesi momentu taben desenvolviéndose: campaña contra la constitución europea, reforma llaboral etc, y foi asesináu’l 11 de setiembre de 2005 en Valledupar (Colombia), por grupos d’estrema derecha.
Recordámoslu y recordarémoslu siempres como un home con un gran corazón, y una inmensa allegría, comprometíu al máximu col so pueblu hasta’l puntu de dar la so vida por él. La so llucha sigue agora más presente que nunca, cuando les garres criminales del neolliberalismu más brutal campea a los sos deleres per esti mundu, arrampuñando los derechos mas elementales a les persones y dexando un regueru de millones de probes, afamiaos y enfermos mientres el 0,1 de la población precisaría delles vides pa gastar tou lo que tienen .
¡Luciano: gracies por enseñalos el camín a siguir!.