Fuelga indefinía de subcontrates nes mines de Zarréu y Tormaleo

Infoasturies. Los trabayadores subcontrataos de les mines a cielu abiertu de Cerréu y Tormaleo, asitiaes nel suroccidente asturianu, entamaron güei una fuelga indefinía pola modificación unillateral nes sos condiciones de trabayu.

Unos 70 trabayadores pertenecientes a subcontrates de les mines a cielu abiertu de Cerréu y Tormaleo entamaron una fuelga de calter indefiníu pola modificación sustancial fecha pol “Coto Minero Cantábrico” nes sos condiciones de trabayu, y que según denuncien los trabayadores foi impuesta ensin previu avisu nin negociación de nengún tipu, polo que la plantilla de Vencobe y Roel Hispánica d’estes esplotaciones entamen un periodu de llucha en defensa de les sos condiciones llaborales.

Coto Minero Cantábrico ye una empresa perteneciente a Vitorino Alonso, patrón que nes caberes selmanes vien modificando de mena regresiva les condiciones llaborales nes sos empreses mineres. Ye por ello que los trabayadores d’Uminsa y 18 subcontrates en Lleón s’atopen en fuelga dende va cerca d’una selmana. En díes pasaos, piquetes d’esti coleutivu impidieron la entrada de trabayadores nestes esplotaciones asturianes a cielu abiertu.